عبدالله العير و رشيد الزلامي
بسم الله الرحمن الرحيم
اقدم لكم محاوره جميله دارت بين المرحوم/ عبدالله بن عبيد العقص العضيله والشاعر رشيد الزلامي
اتمنى ان تحوز على اعجابكم .
عبدالله العير :
سلام يا اصحابنا اللي جيتهم بالوعد=وانا لياجتني الدعوات لبيتها
اصفى سما نجد لابارق ولامن رعد=وانا لمحت المزن ورعودها اوحيتها
رشيد الزلامي :
الله يحييك ترحيبٍ بليا عدد=قدمك رجالٍ ترحبك ليا جيتها
بس المصيبه تجيهم وانت مامعك احد=قامت بك الارض واشتغلت عفاريتها
عبدالله العير:
البارحه يارشيد وليت الاول بعد=وشلون حال الجماعه يوم مريتها
حنّا طراقي ولاحنّا من اهل البلد=لكن دعوتك هذي تعرف بويتها
رشيد الزلامي :
ان كان تنشد جماعتنا بحال السعد=ومطير ماهي على الدرب وتعديتها
وش رايكم في عجوز بليس جابت ولد=واليا اسر الله ضحكتك وبكيتها
عبدالله العير :
الله ولا النشده اللي تاليتها نكد=وشلون موجتك للمطران فريتها
اللي عطتك البريره وانت وسط المهد=قالوا لي انك بعد شيّبت جازيتها
رشيد الزلامي :
الله يعلم رشيد وقصده اللي قصد=مطير من قبل جيراني وحبيتها
لاتحفر المقبره يطبق عليك اللحد=واللي عطتني البريره جيت وارضيتها
عبدالله العير:
الليله انته بعيرٍ تنتظم وتهبد=ماتنتثنّى يدينك مير ثنيتها
اللي عطتك البريره حظها منقرد=عرضتها لاهب الكنّه وخليتها
رشيد الزلامي :
الموج اشوفه طفح والبحر جاله زبد=لكنّ ذيك البضاعه وين وديتها
فزعتك عشرين واللي طاح واللي قعد=وخمخمتها في ظلام الليل واخطيتها
عبدالله العير :
حطيتها في بيوتٍ جودت بالعمد=وانته تباها لكنّك ماتحليتها
الله يعذبك كيف اشغلتني بالنشد=عن حرجةٍ تطلب الميته وذكيتها
رشيد الزلامي :
اقول سبحانك الخلاق فردٍ صمد=عيون فتحتها وعيونٍ اعميتها
يالعير دم الخواجه ماع مدري جمد=وارد عراوي دخل ماها على زيتها
عبدالله العير :
الله ليا راد له حاجه بليا جهد=حرّم عليك الزقاره وانت كنيتها
ماعاد عند الخواجه دم كله نفد=اتعبت رجلك على دربه وعنيتها
حاصل على ترخيص من وزارة الثقافه والاعلام السعودي
عبدالله العير و رشيد الزلامي
العرض العادي
