ثنيان الرشيدي
باسم عبس واسم معزب الضيف اباقول
هلا مرحبا ترحيبة عالميه
الا يالعصيمي حال حول دثر حول
وقلب الموصى محتفظ فالوصيه
مســـتور العصيمي
كلام تقوله يابيض الوجه مقبول
يدوم البقا من حسن خاطر ونيه
انا خاطري في تال الايام مشغول
ولا كني إلا شارب سم حيه
ثنيان الرشيدي
ولا ياوسيع الصدر روح على طول
ترى الوضع ماهو لعبة سامريه
تراك انت في بعض المواضيع ماسول
ياراع الشداد اللي بوسق المطيه
مستور العصيمي
ابروح وانته روح واللغز محلول
ويرعاك ياثنيان رب البريه
لياجبتلك ياصاحبي علم مجهول
ابكشف عليه وحكمته في يديه
ثنيان الرشيدي
..................
............. هذي وذيه (( غيرواضح من الشريط ))
ترى اللي يطق الباب والباب مقفول
يجيه الفرج والا تجيه المنيه
مستور العصيمي
مع الناس انا ماني عن الناس معزول
وصلنا القضاه اللي تحل القضيه
لك فعول ياثنيان وانا لي فعول
تذكر زمان سنينك الجاهليه
ثنيان الرشيدي
مزارع تهامه روحت دون محصول
عسى الله يعوضها بعيد الضحيه
انا ماغدالي شئ والسيف مسلول
لو القى عتيبه نملة فارسيه
مستور العصيمي
يجي في عبادالله مجانين وخبول
تقدم له الحسنه ويعطيك سيه
مزارع تهامه تزرع الدخن والفول
وخليتها لأهل البيوت الغنيه
ثنيان الرشيدي
انا مانهبلت ولاتقفيت مهبول
ولاجيت أدور عند غير حذيه
تجحد سحاب الوسم والثوب مبلول
تسجل عليك من النشاما خطيه
مستور العصيمي
ولا ياثنيان احترص واذهن الزول
ترى الزول ماجابلك غير الاذيه
انا خابر إنك تملك الدر واللول
تجيبه من اعماق البحور العذيه