صوت وصدى إهداء لـ ابو عبدالمجيد

يقول ضيدان بن قضعان:

كمّل جوازي من ختـوم النويصيـب
وأخذت مـن عنـد المحافـظ بطاقـه
لو ماعطانـي كـان ماردنـي البيـب
اليا أرتكى كـلٍ علـى مـخ ساقـه
أطمر من اللكزس وأطوح على الجيـب
ولا نيب فالخفجـي عليمـي سواقـه
وإن مافهقت عصير رغوه فـلا نيـب
شوق الهنـوف العيطمـوس الدقاقـه
بنت الشيـوخ مفرقيـن الأصاحيـب
اللـي يعشقـون المراجـل عشـاقـه
لعيونها تبدي لـي الشمـس وتغيـب
ويلحق بهـا عمـري مـداه وغلاقـه
قلبي وفلذةكبدي اللي بـدا الشيـب
مـن يـوم ماصـار المواجـه شفاقـه
يا الهاجـري مطلـق كثيرالتراحيـب
في وجه ضيـفٍ قـام حظـه وساقـه
وضواه حظـه مـن خيـار المعازيـب
والفـا على أهـل المرحبـا واللباقـه
ملفاه أبـو ناصـر قديـم التجاريـب
اللـي علـى الدنياوثيـق العـلاقـه
فـمشيِّـدٍ ومثـبـتٍ بالأطانـيـب
امروبـعٍ يـذري حجابـه رواقــه
منبيـن ربـعٍ يكملـون المطالـيـب
وكلٍ يسوق الطيـب خـارج نطاقـه
هـواجـرٍ مايجهـلـون المواجـيـب
ولا لهـم عقـب الهجـوم انفهـاقـه
كبيرهـم سوالفـه شـمّـخ النـيـب
لاسولـف الأحمـق علـوم الحماقـه
وأوسطهم إن دارت عليـه الدواليـب
ماطـار بحقـوق الوفـا و الصداقـه
واصغيرهم لا أقبلت رحـب بترحيـب
خطـرٍ يسابـق مرحبـاه بطـلاقـه
يا صاحبي مطلق عطيـب المضاريـب
من قبـل لا يخلـي العراقـي عراقـه
لازم تجـي لـو يزعلـون المناصيـب
لو دونهـا مـوجٍ يهـول إصطفاقـه
البارحه مـن بيـن خضـر الهناديـب
غنـى حمـام الـورق علـى رواقـه
وعـدّا المغنـي نايفـات المراقـيـب
وعنده علـى مبـدا الطويلـه لياقـه
والموهبـه ماهيـب تحتـاج تدريـب
والـذ شــيٍ فالحـيـاة الـذواقـه
ومن سلم اللحيـه لبيـض العذاريـب
لابـد مانعطيـه كــف الحـلاقـه
يا مطلق إرفعها عن الشـك والريـب
ومن كب (ما) الحيضـان ماعـاد حاقـه
وانت الذي يرمي بك الظن ويصيـب
وإلاالردي مالـه علـى الظـن طاقـه
ساسك عريب وراسك أطيب من الطيب
وأبيـك يرخـي للثقيـلـه شقـاقـه
والابل ليـا اقفـت ماتجـي بالمناديـب
وحنـا علـى ماقيـل ربـع ورفاقـه
وأناالخبير بسـوق عـوج المصاليـب
ومـن جـل ذودك ماتنقـى دقـاقـه
نهبت مفـرودٍ يعشـى علـى الذيـب
سلف ومردوده علـى الحـول ناقـه


الصدى لـ مطلق بن ناصر الهاجري

ضيدان إبن منصور يا عيّ يا صعيـب
سمـاك الأزرق صافـيٍ لـك زراقـه
واللي كتبـه الله مـن الله مكاتيـب
سِجّ القـدم واللـي يلاقيـك لاقـه
خابرك لعيون البنـي منـت بتهيـب
لمن طـرى لـك هومـةٍ وانصفاقـه
واللي يجي تهريـب ويـروح تهريـب
مـع السواريـق يتسـرّق اسراقـه
جيبٍ يـودّي بيـن حدّيـن ويجيـب
تحت القمر والشمـس يبـرق براقـه
وانا أدري إنك إنسان ما تعلم الغيـب
ودّك بقـرب الشـر والا افـراقـه
ما افتنك لو القصر ما عنـه تجنيـب
والفتنة اللـي مثـل هـذي اطقاقـه
غزيت كنّك غازي الفطّـر الشيـب
والسالفـة بينـي وبينـك ادقـاقـه
أقلط علـى مـا ربّطـوه الجلاليـب
ربق الغنـم للضيـف نخلـي ارباقـه
قبل الشحم هيل وعقب الشحم طيب
وأهلا وسهـلا بيـن فاقـه وفاقـه
من يجهله قـدر اللحـا والاشانيـب
هذاك من عـرض العلايـق اعلاقـه
إبك الوفا بالعون ما بـك عذاريـب
يمنـاك مغـرافٍ وخاطـرك طاقـه
لجيـت ابوصّفـك رِيّ المحـاديـب
قضعان فـي راسـك بركـة ومحاقـه
وحِلفنـا علـى نبـي الله شعـيـب
ويمكن على المهدي يصيـر انشقاقـه
أنتم غرام اللـي نـوى بالاجانيـب
وحنّـا مـلاذ اللـي عليـه انزناقـه
أنتم وحنّـا مـا نطيـع الزواريـب
وكلٍّ على مـا قيـل حمّـاي ساقـه
سكّين ياسر رزق هاشـل ادغيليـب
يلحـق عليهـا بالمبـارِد إلحـاقـه
يالشاعر العجمي غريـب الاساليـب
عمـر المنافـق مـا يسـرّه نفاقـه
الاديب أديب الشعر ياديب ياديـب
نلعـب إجـداده ونتحفّـظ اعتاقـه
للصدق تصديقٍ وللكـذب تكذيـب
اللي تلصّـق نـدري انهـا إلصاقـه
طوّلتهـا قصّرتهـا تجـرة الجـيـب
وردٍ ولا يكفـي مـن الـورد باقـه
وإن جعت يا محرّم لحمة القصاصيـب
صيد الرمايـة غيـر صيـد الحداقـه
قِـدرٍ مطبّـق لـو تحتـه مشاهيـب
محـدٍ بـداري وش تحـت الطباقـه
دنيا العجايب والعجـب والتعاجيـب
للمنطلـق فيهـا عليـك إنطلاقـه
عصا الإمام اللي حكمهـا امشيعيـب
والغرب من هـدّاج يـروي إشلاقـه
الأمثال تضرب مثل شيبٍ ولا عيـب
ماهيـب مـالٍ مـن تـولاّه باقـه
باضرب مثل وأنت أبعد الشك والريب
المنخنـق خنّاقتـه فــي اخنـاقـه