قصائد مدح الشعراء بالشيخ سعد معوض رفادان العايضي بمناسبة تنازله وعفوه عن قاتل ابنه

انهالت قصائد المدح لعدد من الشعراء في مناسبة تنازل وعفو الشيخ سعد معوض رفادان العايضي الرشيدي عن قاتل أبنه عبدالرحمن سعد العايضي، ثامر معيض الحرثي الذي قتله في 21/ 5 / 1433هــ في منطقة تبوك، لوجه الله سبحانه، تزامن مع شفاء خادم الحرمين الملك عبدالله بن عبدالعزيز، في 16/ 1 / 1434هــ في مدينة الملك عبدالعزيز الطبية بالرياض، واحتفلت قبيلة بلحارث في الشيخ سعد معوض العايضي في 6/ 2/ 1434 هــ في منطقة تبوك.

إلى ذلك، أوضح شيخ العايضات من قبيلة بني رشيد، الشيخ فرح سعود بناي العايضي الرشيدي أن العفو من شيم الكرام، وأن ما حصل قضاء الله وقدره، وقال: من عفى وأصلح فأجره على الله.

وتحدث الشيخ سعد بن معوض بن رفادان العايضي الرشيدي والد المجني عليه قائلاً: في هذه المناسبة العظيمة تنازلت فيها عن قاتل ابني لوجه الله -سبحانه وتعالى- ثم بمناسبة شفاء خادم الحرمين الشريفين، بعد أن منَّ الله عليه بالشفاء العاجل، ولله الحمد أن منَّ عليَّ بهذا الأجر.

ومن جانبه، قدم الشيخ معيض غالب الحارثي والد الجاني شكره وتقديره للشيخ ابن معوض، قائلاً: إن ما قدمه جميل لي لن أنساه، سائلاً الله -عز وجل- أن يتغمد ابنه بواسع رحمته ويسكنه فسيح جناته.
جدير بالذكر أن الرشيدي والد المتوفى كان قد أعلن عن تنازله لوجه الله بمناسبة شفاء خادم الحرمين الشريفين خلال لقائه بولي العهد نائب رئيس مجلس الوزراء، وزير الدفاع، صاحب السمو الملكي الأمير سلمان بن عبدالعزيز قبل عدة أيام.

وقال الشاعر شاعر الوطن : سعيد بن غالب الحارثي.

وافـراحـنـا تـزتــاد فــــي كــــل لـيـلــه= وجتنـا تـعـادا كنـهـا الـبـرق واخـفـاف
وشـفـاء ملكـنـا عـيــد مـاجــا مثـيـلـه= والشـعـب بالفـرحـه تـعـدت لـلاهـداف
وجـــا بـالـحـدث جـــزلات عفوًثـقـيـلـه= ومـده مـن الوافـيـن تـهـدا بـلاجـزاف
والشـكـر والعـرفـان لاهــل الجميـلـه= وجميـل عـن بـعـض الجمـيـل يـشـاف
مــن سـايـر الـحـرث فـخــوذ وقبـيـلـه= وتنصـا بنـي رشيـد وافيـن الاوصـاف
اهـل الكـرم واهـل الوفـاء والسليـلـه= سليـلـة رجـــالٍ لـهــا مـــد واعـــراف
ومنشورها البيضـاء بـراس الطويلـه= ومـن شرقهـا لغربهـا راس مشـراف
ومـن الجنـوب الــى الشـمـال تعديـلـه= مـن فعلـت الابطـال فــي كــل ميـقـاف
اهـل العفـو واهـل السـلـوم الاصيـلـه= زبـن الدخيـل وعــزوتً صيتـهـا نــاف
وعفـو الرقـاب اقــدم علـيـه المهيـلـه=ولابن معوض سجل الشكر بااضعاف
اعـفـا ولـدنــا مـــن سـيــوفً تشـيـلـه= وقال العوض من خالق الكون خلاف
ومـن نفسـه النفسـه فـعـل مستحيـلـه=وتبقـا مـع الاجـيـال ذكــرا وميـصـاف
وشفـاء مليـك العـرب صــدق مخيـلـه=واهـدا سعـد جمـيـل يبـقـى لـلاسـلاف
اهــداه عـتـق رقـــاب مـاهــي قلـيـلـه=وفرحتنا الثنتيـن مـن طيـب الاشـراف
وشفـاء الملـك واعتـاق ثـامـر دليـلـه= وهـدا سعـد ثقـال يعـجـز بـهـا الـقـاف
وانــا اشـهـد انــه راس قــومٍ بجـيـلـه= وفعـل الرشيـدي ديـن مّثقـل للاكـتـاف
ونشكـر سعـد والطيـب جـاء منتحيلـه= مـنـا ولاتـوفـيـك يـالـقـرم الاوصـــاف

شاعر الوطن : سعيد بن غالب الحارثي


بعد جت دعوتن من عزوه اللهم حشمه ومقدار= بني الحارث شبابه والشبابي يفتخر فيها
دعاني الماقف وجيت اله البي وانظم الأشعار= بنات افكاري اللي من هواجيسي مسويها
اصفيها وانقيها درر من خير الاخيار = واقدمها مثايل تعجب السامع وموحيها
سلام ومرحبا ترحيبتن باهل الوفاء والكار = تراحيب الوفاء لاهل الوفاء اكتبها واغنيها
أقوله بالنيابة عن شبابه غايب وحضار= لحضار الحفل في ليلتن يا سعد اهاليها
أشوف الحفل نوره زاد بحضرة الزوار= ونوره عم كل الدار قاصيها ودانيها
يشرفنا حضور أهل الوفاء والصيت والأذكار= صناديدن مواقفها فخر لاجيت اسميها
حضورك يا سعد يا بن معوض يلفت الأنظار= بعد صرت السبب في نفس من الموت محييها
يا بن عبس انته أشهر من علم فوقه نشوف النار= يا راع المرجله فعلتك ما كلن يسويها
تعتق أرقية من وسوس له الشيطان بالأخطار= وتفرج كربة المضيوم لاجاء الضيم داعيها
هذا من ساسك الطيب يا منبع ماكر الأحرار= هل الطالات وأهل المجد حاضرها وماضيها
بني قيس الزحول اللي صداها ذاع فالأقطار= رجالن في مضر وفي معد ترجع مجانيها
لها التاريخ سجل مجد لو لف الزمان ودار= ما يمحي مجدها ومثبتن والناس ترويها
أهل فزعة وأهل نخوه وأهل حشمه لضيف وجار= دواوين القصايد ما تكفي لو أسويها
والا يالله يا رب الملا عالم الأسرار= يا خالق خلقه وعالم بأجلها وأنت محصيها
تكافي اللي عفا وأصلح لوجهك عن لهيب النار= وتعوضه في ولده اللي ذهبت نفسه لباريها
عفية ولا تبي غير الجزاء من والي الأقدار= عسى ربي يجازيك بجنانه مع مجازيها
وأنا من عتيبة الهيلا أهل سيفن وقحص ومهار= هل الأفعال والنوماس بأولها وتاليها
لنا تاريخن أبلج ما جهله البدو والحضار= ليا دارت رحى العتبان تطحن من يعاديها
هذا من دون قاصر فالقبايل فيهم الأخيار = تحوش الطيبة والطيبة من حض راعيها
وصلوا عد ما زار الحرم وأطاف من زار= على محمد شفيع الخلق لاجت عند واليها

الشاعر: ماضي بن سعيد العتيبي

احمد الله ثم أهني الوطن بأجمل خبر = بعد ما شافا الملك يا عسى عمره يدوم
عاش أبو متعب حماه الولي من كل شر= خادم البيتين عز الوطن سقم الخصوم
العطاء من كف جوده على شعبه نهر= حقق أل شعبه كل الحلوم
وبعدها يا كل رجال في المحفل حضر= اسمعوا من جديد المثايل والعلوم
باسم أبالحارث مشايخ وعيان وجبر= مرحبا بالعزوه اللي يسدون اللزوم
يا بني رشيد يا مرحبا عد المطر= يأهل المعروف والطيب ورجال السلوم
يا رجال في اللقاء موجهم مثل البحر= يغرق السباح لو كان من صغره يعوم
الوفاء والطيب عاداتهم بدو وحضر = عزوة بأفعالهم اعتلوا فوق النجوم
الخوي والجار يامن بهم عند الخطر= في كنفهم ما ينوشه برود ولا سموم
ولدخيل أليا نصاهم يشدون الظهر= وضيفهم يلقى مع الكيف زاهية الشحوم
عبس عنوان الشجاعة على طول الدهر= خصمهم لا شافهم تعجز عظامه تقوم
في نهار السلم يجبرهم أعظم كسر= ومن يديهم في نهار اللقاء رمي السهوم
سيوفهم مضرابها بين الثنادي والنحر= وقسمهم بين الريجيل من خير القسوم
وبيض الله وجه رجل من أرجال الظفر= الشجيع العايضي نومس أربوعه عموم
البطل سعد معوض تجمل وأشتهر = يطلب العليا وطبعه عن ألهزله يشوم
اعتق المسجون ثامر من الموت الحمر = الله يجازيك بالخير يالوجه الرحوم
اهتنت عينه بنومه بعد طول السهر= خايف من السيف بيدين سياف ولوم
يا سعد فعلك يجملك مع كل البشر= وقت بالمعروف يالعايضي عالي الرجوم
اشهد أنك يا سعد من بعيدين النظر= فعلك الطيب يتعب قويين العزوم
أنت نجم الجدي ابه يقتدي ناوي السفر= وأنت ما بين الريجيل غالي ومحشوم
وأنت حر في سماء المجد بجناحه شهر = حر من طبعه وفعله على الجزلة يحوم
وأنت كاسب نعم قول وفعل ولك الفخر= ملتبسها مثل ما تلبس جداد الهدوم
نعم كلمه غالية وأنت قدمت المهر= مهرها عتق رقبة من شباء السيف الحسوم
وأنت معروفك كما النقش جنب الصخر= ما يزول إلا تزول المدينة والجموم
أنت معروفك في رقابنا طول العمر= ما يضيع الطيب بين الريجيل القروم
إلك منا الحب وإلك الدعاء وإلك الشكر= نطلب الله يسعدك كل ليل وكل يوم
والله يعوضك في أبنك ويعطيك الأجر= ويسكنه في جنة الخلد من ينشي الغيوم
والله يومنك ويومنه يوم الحشر= ويأخذ كتابه بيمناه بالمسك مختوم
دائم المؤمن ليا صابة ضراء صبر= والصبر نعمه من الرب جلاي الهموم
والصبر والعفو طبع الكريم إذا قدر = والتسامح والعفو عادة القلب الرحوم
وأن بغيت أقولها يا سعد بالمختصر= أنت معروفك علينا كبر ضلع البقوم
أنت راعي ألأوله يا سعد وجه السفر= أنته وربعك هل ألأوله من رؤس قوم
وعد من زار المدينة ومكة واعتمر= صل يا سامع على اللي من الذنب معصوم
محمد اللي سنته واضحة مثل القمر= خير من صلى وزكا ومن حج ويصوم

الشاعر محمد سعد سلمان البلاهدي الحارثي

بديت بلا إله إلا الله الواحد وبسم الله= تذل المعجزات وباسمه الصعبة نذللها
إلهٍ ما سجدنا إلا لوجهه خاضعين جباه= وغيره ما خضعنا له لو الأفعال يفعله
ولله الشكر والحمد والمؤمن على تقواه = ومن له حاجةٍ مهما تكون الله يسهلها
على الله اتكلنا واستعنابه عظيم الجاه= على جور السنين وفتنه الحشر وهوايلها
عسى الله يجزي أهل الخير خير ومن يمد يداه = لربه صادق النيه معه حتماً يجملها
بعدها مرحبا ترحيبةٍ تروي عن المضماه = على شان الضيوف نسوقها سوق ونعجلها
هلا يا مرحبا عداد برقٍ لاح في منشاه = مزونه ردمت ثم ارزمت وانشت مخايلها
يعم أرض الوطن شام ويمن شلال ينثر ماه = وتنبت به مقاطيع الدير ويطول طايلها
يغاث الناس ووحوش الفلا والطرش في مفلاه = ويغير وجه الأرض أغبر بوجه أخضر يجملها
هلا يا مرحبا ترحيب مثل الذوب من مجناه= عسل صيفي منزه عن صنوف الغش بأكملها
وريحه مثل ريح الورد في جو يطيب هواه = من جبال الهدا وجبال ميسان وجنادلها
يطيب لنا نزف لكم من الترحيب ما نقواه = ونصخى بالدبوش وبالقروش اللي نحصلها
لكم يا بني رشيد أزكى تحيه بالوفاء مهداه= عبارات الشكر في قدركم ننقي جزايلها
ومن لا يشكر الناس بفعلها ما شكر لله = وشكر المحسنين أسمن عبارة قال قايلها
ولا يصلح جزا الإحسان غير أحسان من سواه = وناس تجحد المعروف لا حلت حبايلها
ومن لا يعرف الطيب بفعله ما هو بشرواه = قليل الرشد من لا ينزل الناس بمنازلها
كما يقلون من لا ثمن المعروف ما يسواه= ثقيله والثقيله يسعد الله من تحملها
لقيت اسم الرشيدي فالاسامي زايدٍ معناه = سواة سهيل من بين النجوم اللي نخايلها
قبيلة من سلايل عبس والتاريخ راجعناه = من أسياد العرب يوم العرب تذكر فعايلها
لهم تاريخ رصع بالذهب والوقت ما يمحاه = سيبقى حي حتى تفضي الدنيا لزايلها
على مر السنين الناس تذكر داحس وغبراه= وتذكر ما جرى والحرب تحسمها بواسلها
عقلها هرم والحارث ومدوا للغريم رضاه= تنادوا بالعفو والحرب طفا الله فتايلها
خذت عبس وبني ذبيان مجد الكل يتمناه = وخلد ذكرهم في تالي الدنيا وأوايلها
وصاروا مضرب الأمثال فالنخوه لمن تبلاه= مقادير الزمان اللي ثقيلات حمايلها
ومنهم عنتر اللي لانكسر سيفه جذب شلفاه= فعايل فارس الأدهم ما فيه إنسان جاهلها
ومنهم كم وكم فارس وكم قايد نجح مغزاه = زحازيح الرجال اللي فعايلها ترجلها
ومنهم مثل بن معوض سعد وبني رشيد عزاه = كبير القلب زيزوم المروه في مداهلها
سعد وجه السعد يلقى السعد والطيب من ينصاه= بشوش وجهه مثل قلبه يوم احللها
أنا يالعايضي عن وصفك أعجز واللسان أبراه= وفعلتك العظيمة معجزه كل يسجلها
صبرت وفزت بالجنة وأطعت الله ونلت رضاه= وهذي مكرمه ما كل طويل ذراع طايلها
ودخلت المجد والتاريخ من بابٍ وسيع فناه= وسنيت العفو لأهل الدما واللي يماثلها
من أول كان دينك عند وأحد ماسك بيمناه= تبي من القضا والحق ما ناسٍ يزعلها
وهذا الليل دينك عند الوف مولفه تلقاه= من بني حارث اللي ما تندم من يعاملها
رجالٍ تعطي الطيب مثل ما تأخذه بملاه= ولا ضاع الجميل بحارثي والله لا يجعلها
لئيمٍ يجحد الطيب ما هو منا عسى فرقاه= ولا يوفي بفضل الجيدين إلا مواصلها
وبن غالب معيض يثمن الموقف ولا نصخاه = كفو يستأهل الفزعة تسخر له وسايلها
وأخوه سعيد وأنعم والخطأ والعيب يتعداه= أبو تركي من شيوخ الرجال ومن حلاحلها
ورثها ورث من جده وأبوه وخاله ومرباه= إذا ضاعت دواليل العرب يعرف يدللها
ولولا الضيق والضدات ما نعرف هذا من ذاه = موازين الرجال بفعلها وأمجاد أوايلها
يقود العايضي شيخٍ بريع ٍ ما يغط ثناه = فرح بن سعود يا سعد الوجيه اللي يقابلها
خدم ربعه وشيد مجدهم لين استوى مبناه= هذا فعل الشيوخ اللي إذا مالت تعدلها
وله عزوة لو أوما شرق ولا غرب ما تعصاه= نصيف الليل ولا شدة الشمس وقوايلها
ولو نحكي عن أمجاد الرشيدي عام لين أتلاه= يطوف العام ما جاب الكلام إلا قلايلها
بدون قصور في باقي العرب بأقصى البلد وأدناه = قبايل من قبايل والعوايل من عوايلها
وارع ألأوله نثني الشكر والحمد بعد الله = لبو متعب مليك المملكة حامي معاقلها
عفيتوا في جنابه وأفلح اللي للشفاعه جاه= وغالي صحته لاصلاح ذات البين باذلها
أبو متعب ذرانا والقلوب تفوز من طرياه= زعيم أمة محمد راية التوحيد شايلها
ضمايرنا ملكها ملك والمفتاح في مخباه = مفتاح الخير وأبواب الفتن عنا يقفلها
عسى الله يحفظه والحمد لله بعد ما شافاه= ويصخر له قلوب الناس والدنيا يذللها
ولي العهد وافي الوعد سعد اللي لجا بحماه = أبو سلطان خلق الله بعفو الله يعاملها
يعلم عنه من زاره ومن ضافه ومن خاواه = زبزن المدلهمات الكبار اللي يزاولها
فتح بابه لفعل الخير والمعروف ما يخفاه = مساعيه الحميده بالنجاح الله مكللها
وأسال الله بعفوه من دعا صادق يجيب دعاه= يحفظ المملكة من كيد الأيام وغوايلها
وإلا يالله تجمل من تجمل والجميل أسداه= ولا يبقى من كنوز الرجال إلا جمايلها
وصلى الله على الهادي البشير وزيدوا الصلاه = صلاةٍ دايمه ما عانق الأمواج ساحلها

الشاعر الشيخ راشد عيضه فالح الحافي الحارثي

من يفعل المعروف يجزى حسانيه= عند الإله اللي عظيم ثوابه
لعل رب البيت بالخير يجزيه= وينجيه من هول الحساب وعذابه
الطيب ضلع متعباتٍ مراقيه = ما يأصله يأكود حرٍ رقابه
ما تختلف طول الليالي مباديه = شبل ٍ على الطالات ناشي شبابه
هذا سعد والسعد فعله بياديه = الله يا علم ٍ نواه وبدابه
قال العفو والصلح حنا مناهيه = والفضل لله والأمل والرجابه
عتق ٍ لوجه الله ربي وأنا أرجيه = يشفي ملكنا الفيصلي من صوابه
البيض ترفع للرشيدي وتكسيه = وتنشر لك البيضاء قبايل شبابه
فعلك مع الأيام ما أحد ٍ بناسيه = لا والذي ينزل صدوق السحابه
مجد الرشيدي وأرثه من مجانيه = من رؤس عبس أهل السطر والمهابه
حقائق التاريخ والناس ترويه = أمجاد عبس وفعلها ينحكابه
مثل الخيال اللي تعلت مناشيه = اشعولة البارود جاله ضبابه
وسعد على النوماس والطيب حاديه= علم ٍ ينومس لأبته واعتلا به
يا سائق الفنجال من كف راعيه = مده على اللي ما تلعثم جوابه
اللي على الطالات شيد مبانيه = سيف ٍ تنومس سلته من نصابه
وفي ليلة العرفان والشكر نبديه = جتكم بني الحارث ولا هي غرابه
نادوا لحفل ٍ ساميات ٍ معانيه = عرفان لأهل واللي مشابه
ذولاى بني الحارث كبار المشاريه = مقفلة بالحق باب الطلابه
تركن لصكات الزمان وبلاويه = تخوت الجمال وحملها ما تهابه
جمرة شبابه صاحب الدين توفيه = حسب السلوم الواضحة والرحابه
قاموا على الموضوع وأنهوا دعاويه = ما هي كلمة خلها وش تبابه
قولي عن العتبان والناس توحيه = عتيبه الهيلا عيال الصحابه
رجالنا للطيب تسرع خطاويه = واليا وصلنا موجب ٍ مرحبا به
واليا دعا داعي شبابه تلبيه = وميقافنا معروف حزم وصلابه
وأختامها بالعود والمسك قافيه = وأنا شبابي موقفي مع شبابه

الشاعر: نايع محمد العتيبي


وأعتذر عن بعض الشعراء الذي لم اتمكن تنزيل قصائدهم حفاظاً على الشاعر لانها لم تكن وأضحه بعض أبيات القصائد التي وصلتني.

شكرا لك على نقل التغطيه الى موقع الجميع