الشانزليزيه

هذي بداية شارع الشانزليزيه

هذي نهايه للحيا والرجوله


جينا نشوف الناس وش عينو فيه

ناس تقل تاخذ لمليه عموله


مليان من راسه الي حد رجليه

فيه الاوادم حذف من كل دوله



احد(ن)يجي شحاد واحد(ن) يجي بيه

كلن يجي شكله بحسب السيوله


هذاك لابس له قميص(ن) مكفيه

وهذا قيص اخوه ماهوب طوله


وهذاك مدري وين والله اوديه

قمّة انوثه والمواري فحوله


شواربه تاصل الي حد اذانيه

واليا حكي نغمات بنت معسوله


كل شخص يبغي الي يسوي يسويه

وكل شخص يبغي الي يقوله يقوله


ما عندهم وشلون ما عندهم ليه

ماعندهم كلمة خجول وخجوله


متقاضبين وكلّن بجال كافيه

والزين كلّن وده يصير حوله


ماعندهم مبداء ولاعندهم فيه

وكل شي صعب يصير بسهوله


وانا معي ديديه وش صار ديديه

شكله وهو جنبي تقل ربع توله

لو وقف بجنبي ولو يرفع ايديه

لاهو ب لاطولي ولانيب طوله

لو مانتبهت لسكتي كان واطيه

الله يفارق بين زولي وزوله

لبّيه يامكه ويا نجد لبيه

عشقي من ايام الصبا والطفوله

فقدت صوت(ن) خمس مرات نوحيه

صوت المأذن لاارتفع وش يطوله
الشاعر زيادبن نحيت