ياللي تقول إنك من الوقت ضايـق
محـدٍ بهالدنيـا تكامـل ســروره
منت الوحيد اللي لقـا لـه عوايـق
ا لمستريـح اللـي يسايـر امـوره
العمـر ساعـة والليالـي دقايـق
لو طالت سنين الزمـان وشهـوره
لاترمي اوهامـك بوجـه الحقايـق
لاتشتكـي ظلـم الليالـي وجـوره
استر عيوبك عن عيـون الخلايـق
خلك على ماقيل نفسـك صبـوره
لاتلتفت لأهـل العقـول الطفايـق
لاكل مـن قابلـت ينطـاع شـوره
لاتعتبـر بعـض الرفايـق رفايـق
لاصرت ماترجيه وقت الضـروره
لاتأخـذ الدنيـا بكثـر الوهـايـق
درب الخطايـا لاتحـاول عبـوره
خل الأمل يبقـى بشتـى الطرايـق
انس الزمان اللي بـلاك بشـروره
جـدد مـع الأيـام كـل الوثايـق
ترى الفرح لوغاب يمكن حضـوره
تلقا الصحاري في عيونك حدايـق
دام الرجاء تومي بدربـك زهـوره
لوشفت من وقتك سموم وحرايـق
اصبر اليا من يطلع سهيـل نـوره
خواطـرك لوجنّبتـهـا الوفـايـق
يمكن مـع الأيـام تجبـر كسـوره
لوشفت غيرك خالي الهـم رايـق
لابـد مايأخـذ مـن الوقـت دوره
مادام كلٍ مـن غثـا البـال ذايـق
كل البشر طبق الأصل وإنت صوره
الشاعر/ صقر السلوة
حاصل على ترخيص من وزارة الثقافه والاعلام السعودي
ياللي تقول انك من الوقت ضايق
العرض الشجري