والله مابيعك بالغنـــم يالمغاتـيـــر...واني مابدوي بــك من الناس شـــــاوي

مجاراة عبدالله بن عون .. ومحمد خلف الخس

قصيد:عبدالله بن عون


والله مابيعك بالغنـــم يالمغاتـيـــر...واني مابدوي بــك من الناس شـــــاوي
حتى تخضين الفيـاض المخاضيـر...وتقطــــفين ارقــــاب نبـت الصـــداوي
اليا جاء لروس قليقـــلانـه نواويـــر...مثل الدقـــــوق بريش خطـــو النــــداوي
الابل محبتهــــا لهـا طابعـــن غيـر...واليا وقعـــت فالقلـــب ماهيـب تـــــاوي
ثنتين مافيهـــن مسـاوم وتسعيـر...لا فاتن الرجـــــال طـــاح متســــــاوي
دامه يراودهن وهو في رجاء خيــر...ولا غيرهـــن لمـــراض روحه مـــداوي
وليا تركهن هف مع شفـــت البيـر...وصارت اموره بين هــــاوي وعــــــاوي
محبة الوضحـــا وحـــب الغناديـــــر...يستـــــانس اللي في طلبـــهـا رجـــاوي
اليا عرضت شقرا شــعرها دعاثيـر...بعيونها تخلــــــف مســــار الهــــواوي
واللي يبي يطلب عن القول تبريـر...لاينشــــــد الا طيبـيـــــن الهـقــاوي
يرفع لمثل لمحمــد الخـس تقريــر...ويستنظر الحــــل الصحيح القصـــــاوي
واليا خذا التقرير من شـاعر مطيــر...تـراه حلـــن مايعقبـــــــــه دعــــــــاوي
ويمكن يقول الثالثه نقلـــت الطيــر...اللي حصل رفض الجنـــاح الرهـــــاوي
رفض الجناح اللي ليا استتبع السير...حول على راسه بالامر السمـاوي
طرح الشبك ماهوب من وارد الجير...من طار من عشه امراحه خـــــلاوي
:::::::::::: :::::::::::::::::::::: :::::::::::::::::::::

وهذا رد ابوخلف محمد الخس
جتني بيوت مصخر القاف تصخيـر...عبـدالله النايـف ربيـع الفـداوي
يقـول وش رايـك ويبانـي اشيــــــر...رايي مثل رايك على منـت نـاوي
ياراعي الوضح الخيار المصاغيـر...اللـي لمثلـك ماتجـي بالمنـاوي
لاتطيع بالمغتـر جميـع المشاويـر...كانك علـى لـذات قلبـك شفـاوي
خل الغنم لو هـي تجيـب الدنانيـر...راعي الغنم فقري لو انـه غنـاوي
ليا طاح من غر المزون الشخاتيـر...فأرضن بعيدأ دونها الذيـب عـاوي
ثم جاء لعشب الوسم فيها دواويـر...وتغاوزوها مـن جميـع النحـاوي
راع الغنم ماهوب ياصـل بتيسيـر...الا بشيـل وحـط واخـذ وكـراوي
والبل تزاعج مع وجيـه المظاهيـر...يومن لها عشر اجبتـن للشـواوي
تاصل ولو ان الحيا من ورى الذيـر...مادام تلقى مـن شحمهـا شـلاوي
ويضأ ضحاياهـا رقـاب المناعيـر...يوم الطرب قبل السـلاح النـواوي
وان جتك عكشأ مثل خشف الحمارير...نبريـه تبحـث خفـا كـل غـاوي
ارجع لها لو يزعلـون الحجاجيـر...كان انصحت لـك بالغـلا لاتـراوي
والاشقر اللحـاق عـوق المدابيـر...لاتتركه دام انـت هـاوي وقـاوي
اللي تماري بـه جميـع الصقاقيـر...لاجيت قاعن فيه عشـب وحـراوي
وانته سديد الراي في كـل تدبيـر...وتسنـع الغـاوي كفيـت البـلاوي

صح السان الشعراء

وسلمت يمناك على النقل الرائع.

اي والله أن را ا ا ا اعي الغنم ماهو مرتا ا ا ا ا ا ا اح احسنت الاختيار رو و و و وعه