الحالة
السلام عليكم ورحمة الله وبركاته صراحة لقيت هالموضوع ومره عجبني وحبيت انقله لكم عشان تعم الفائدة الموضوع كبير ومحتاج تركيز ومرونه وفهم مابين السطور لانه طفل عن طفل يختلف بدرجة الفهم والاستجابه والاهم ان هالموضوع موجه لكل انسانه تستحق ان تحمل لقب ام.... بكل مافيها من تعب ومعاناه فالتربيه.... وتعرف ان ربي ملكها روح بل ارواح بتكون مسؤوله امام الله عنها.... من قديم الازل والامهات مربيات... علي الاقل انا اتكلم عن تربيتي ... امي جزاها الله عني كل خير... مربيه من الطراز الاول... فلو نظرتوا لكثير من مواضيعي دايما اذكر عبارت ( امي تقول)... لاحظوا بعد هالسنوات الطوال من الزواج مازالت كلماتها محفوره بداخلي.... ببدأ موضوعي هذا بكلمات لهذي الانسانه العظيمه.. (لولا المربي ماعرفت ربي) وهذا صحيح واكبر دليل... قول الرسول الكريم...عليه الصلاة والسلام (كل مولود يولد على الفطرة فأبواه يهودانه أو ينصرانه أو يمجسانه)... انا اربي ابنائي ليواجهوا الحياة بقوه وجلد وصبر.... ويعتمدون علي انفسهم.... لحد يقول ليه بيحاربون .... نعم بيحاربون وبيصارعون وبيواجهون اعاصير الحياه بدخل فالموضوع مباشره وبيكون علي شكل نقاط... نبدأ من عمر السنتين.... واصغر شوي... اذا بدلتيلها ملابسها خليها تشيلها وتحطها فالسله... وانتي معها طبعا...بس هي او هو علي الاقل يكون معه قطعة من ملابسه... بعد ما تستخدمين المناديل لها... عوديها تحطها بالزباله... يعني مره ومره.... اربع سنين.... وهو عمر الروضه... تلعب علي كيفها وتحوس غرفتها او مكان العابها... وبعد ما تخلص ترجع كل شي مكانه... ومكانه ضروري... وتجمع زبالتها وقراطيس الكاكاو والشبس .... تتعود ماتقعد بمكان وسخ.... تتحمل نتيجة اختيارها وقرارها.... ادري بيتستغربون... بذكر موقفين لي مع بناتي يوم كانوا فالروضه.... الموقف الاول مع ساره.... كانت بثاني روضه... وكان الجو الصبح بارد... وبعدين يدفأ... قلتلها ياحبيتي البسي جكيتك قالت لا.... يابنتي بيذبحك البرد.... رفضت وانا عارفه انها رفضت تقلد بنات معها .... يلبسون نص كم.... تركتها ماشديت عليها لاني عارف.... كلها فتره بسيطه وبيدفا الجو بس خليتها تخوض التجربه.... وحذرتها اني اذا طلعت من البيت ماني راجعه اختها الصغيره سمعت كلامي ولبست.... واول ما طلعنا من البيت لفحها الهوي البارد... وحمر خشمها وقالت يمه برد... قلت ادري علمتك بس انتي عاندتي... والله ان قلبي مثل النار ونفسي هازتني ارجع البسها بس صملت فيها ابيها تتعلم.... مشت وهي ترتجف ومدخله يديها بجيوبها.... واختها تسولف وتضحك... واقولها شوفي اختك شلون مبسوطه ودافيه... المهم لها الحين سنتين الموقف راسخ بذهنها... اذا جات تروح المدرسه فالشتاء تقول البس جكيتي... اقول والله ياحبيبتي اليوم برد وانتي حره تبين تلبسينه البسيه ماتبين انتي حره... تقول لا يمه بلبسه واذا احتريت فسخته... طبعا انبها انها اذا نسته فالمدرسه او فالباص... ما راح اشتريلها غيره طول السنه.... مدارسنا لازم لون معين مو مسموح بغيره فهي عارفه انها ماتقدر تلبس اي جكيت ثاني عندها... الموقف الثاني مع دانه.... تتمرد احيانا علي النوم بدري... افهمها اني ابيها ترتاح والنوم راحه... واذا نامت بدري بتقوم نشيطه وبتستانس فالروضه والله اكلمها كذا نفس ما اكلم الكبار... بس معانده ماتبي تنام... المهم اخليها تطلع من الغرفه عشان ماتزعج اختها واتركتها تتاخر شوي... الصبح طبعا مالها خيار فالغياب بداوم يعني بداوم خصوصا اليوم اللي تنام فيه متاخره.... وبعد مارجعت كانت تعبانه تترجاني ترقد شوي... والاجابه طبعا لاااااا.... وقت النوم قلت جا وقت النوم يالله ياساره... قالت يمه وانا.... قلت انتي تحبين السهر... بتقعدين معي بنسولف ونضحك... قالت وساره... قلت بتنام وترتاح وتقوم الصبح شبعانه نوم ونشيطه.... قامت تترجاني عشان تنام.... بنتي هذي ماتعلمت من مره مازالت تعيدها احيان وانا اكرر نفس العقاب... وهذا يثبت كلامي اللي باول الموضوع طفل عن طفل يختلف... فالسوبرماركت.... اتلون معهم مره ادلعهم ياخذون كل اللي يبون ومره شي واحد او اثنين من اختيارهم.... ومره ولا شي ويسمعون كلمه ....لا رجعيه.... انا ما اكسر بخاطرهم انا اربيهم.... بطبعي اتكلم معهن اطلع اللي بخطرهن.... اقول عادي مو لازم كل مره تشترون.... وطبعا يصير حوار.... اذا شريتي لهم اشياء بسيطه.... عطي كل واحد كيس اغراضه يشيله.... احيان اعطيهم مبلغ معين 10 ريال مثلا.... وقولي اي احد يبي شي من فلوسه.... وبعد بذكر تجربتي.... ساره كنت متاكده وواثقه انها بتضيع فلوسها... او بتشتري اي شي المهم ما ترجع ومعها قرش اما دانه ما كنت عارفه كيف بتتصرف.... طبعا ساره قامت تحوس مره تبي لعبه... ومره تبي كراسه... وشوي تبي كاكاو... قلتلها انتي حره بس تشترين بقيمه فلوسك ماني زايدتك ولا ريال.... وفالاخير ضاعت فلوسها مثل ما توقعت وماشرت شي.... دانه... قالت ابي مرطب قلت من فلوسك... قالت ها...لا مابي رجعيه بعدين قالت ابي رغوه قلت من فلوسك نفس الشي رجعته.... وللحين ماشرت بفلوسها شي..... انا عاد شريت شبس وقلت هذا لي ولبوكم... بشوف ردت فعلهن... ساره تتحسر كل ماشافت اختها عندها الفلوس وتقول يمه سامحيني... قلت مسامحتك...قالت يالله عطيني بدالها قلت انا سامحتك انك ضيعتي الفلوس وهي نعمه لكن ماقلت بعوضك بدالها.... احمدي ربك اني ماعاقبتك...لانها المره الاولي بس اذا عدتيها بعطي دانه وانتي لا.... كثير من الامهات وانا منهن.... استغرب ليه تحل اذا كانت عندي وفالمدرسه لا الاجابه لانها تعتمد علي وجودك جنبها وانها اذا اخطأت بتصلحين لها... المفروض تكونون بغرفه وحده او بالصاله... وتقولين روحي حلي المسائل واذا خلصتي جيبها او اكتبي الواجب واذا خلصتي جيبيه اشوفه... جربت هالطريقه والحمدلله نتايجها حلوه... اذا صارله مشكله فالمدرسه.... علميه يروح هو يشتكي للاخصائي.... واكيد اذا كان الامر يحتاج تدخلك بتدخلين بس لازم هو او هي يتخذ خطوه.... يتبع....