حتى واقعي اللي اعيشه الان بما فيه من حياة مدنية مانساني تسلسل الواقع الزمني اللي مر فيها الأباء والاجداد ، فما طلع معي إلا اني اصور تلك المناظر بصورة شعرية تجعلنا نتذكر شيء مما غاب عن البال ووقر في الحال.

من هاجسي سجيت مع خايع الدو=وخذيت لي في عالي الرجم عفه
قبل الغروب .. العصير صافي به الجو=غربي "دبي" .. شرقي "رخه" يحفه
رجم به الأسلاف داجو ومرو=أثارهم في حدر حيده مصفه
باقي بقايا وجار من شبة الضو=وباق النضد لأغراضهم حيد رفه
على الوفا والطيب ياما تناخو=عاشوا على وقت العصور المحفه
عجلين لا مدو ووافين لا عطو=ناس(ن) بهم مع خفة الدم عفه
محلا تشاورهم ليا من تنادو=رجالهم علم الوفا راس شفه
لهم حداوي كان للعد وردو=ولدليهم مع طية البير هفه
اسقوا دبشهم طلعة الشمس مالهو=وكل(ن) طوى حبل الرشا ثم لفه
وليا ذكر طاري الحيا ماتوانو=عساسهم جاب العلوم المشفه
وعلى الرحيل ان كان باكر تواصو=كل(ن) عجل لا شال حمله وضفه
على الركايب كان شالو وحطو=واغراضهم ماهي ثقايل وخفه
وليا مشى مظهورهم بدو شدو=على الجمل يلوح شاهد وكفه
مابعد معشاهم ليا من مدو=قد خايلو برق(ن) بعيد(ن) مرفه
وليا نزلو خضر الفياض استجدو=بدو(ن) على شوف الحيا مستشفه
والعلم عنهم كان جابو وودو=رجالهم ياسعد من كان صفه
فعايله تصدق كما صادق النو=لا لاح برقه والهبايب تزفه
يفرح بضيفانه من البعد للفو=سيما الكرم على جبينه وكفه
ياعونة الله وين جيل(ن) لنا اقفو=ماغير طاريهم بقى نستشفه
يسقيك ياديرة جدود(ن) تنحو=واحفادهم على الوفا مستضفه