الا ياكثر ماب السوق من خاسر ومن ربحان=ولا ياكثر ماب السوق يابطلان جلابه
انا مااقول ذا مخطي ولا ابقول ذاغلطان =ولا ابقول ياذيب الخلا سرحان وش جابه
حسب ظني صعدتم للقمر مع عالم الرهبان=وبعد ماجيت في ذاك الفضا وش شفت بترابه
بنيت البيت بالمريخ واسسته بلا عمدان=وانا اقول الاساس اللي بنيته ما انفتح بابه
قبل لا تبني جدار البناء شيك علي البنيان=يجيك السيل من حدرالاساس ويشلع اطنابه
توقع لا تنفقع منت لا صاحي ولا مرضان=نبي نعطيك سام اثنين ما يخطيك مضرابه
ترى من له حيله يبي يحتال ياحيلان=وانا سبع الي شفت الثعالب تقرب الغابه
قبل لا تعرض السلعه قبل لا تدخل الميدان=يعرف السوق تجاره ويضيع اللي تهقوابه
ترى قبلك خسر غيرك لونك تعرف الندمان=ولا تدخل يدك بالجحر ثم يقرصك دابه
أحد يشرب من الدله واحد يقلط مع الضيفان=واحد جاه الجزاء والذيب تكره شوفه انيابه
عرفنا اسهيل من نجم الجدي والعلم توه بان=تبي تبرك ليا شفته ان كان الحق ترضابه
ترى من يدخل الكعبه بعد يحرم من الدخان=وانا ابحرمك من ورد القليب اللي وردنابه
حسبنا الورد وايضا الصدر ةاعتذنا من الشيطان= تركنا السانيه فوق الجمل يقبل ويقفابه
قفلنا القيد في سجله وبينا للملا عنوان=مثل ماقيل كل دون حقه نوخ اركابه
لا ياطير ياطير الندم ياطير ابن برمان=تبي تصيد لكن صادك اللي رز منسابه