أنشدك وأبغى منك فتوى وتفسير=فتوى الشيوخ اهل اللحى والعمايم
لاصرت أكلم شخص مزيون وصغير=هو يجرح صيامك لياصرت صايم

أن كان هرجتكم موده وتقدير=ياللي على لاما عشيرك مهايم
والود صافي من جميع المحاذير=ولا يلحقك في بعض الأحوال لايم
وفي صوتها حلم وخرافه وأساطير=وسحر وبخور وتمتمات وعزايم
وقام يتدفق عن شفايا مفاتير=رش خفيف ومقتفيته نسايم
ياخذك من نشوة لصحوة لتخدير=ثم يتمرجح بك هديل الحمايم
وحسيت لو أنك عن الرض بتطير=وقامت تحلق بك غمايم غمايم
وقامت تحضر بك جميع الطوابير=وأنت متشتت ومتقسم قسايم
وتبي تكلم وأخذلتك التعابير=وأصبح يصير الوضع ماهو ملايم
وصارت صباح الخير عندك مساء الخير=وتقطعت فيك السبل والعلايم
ذي ماتبي فتوى ومن غير تفكير=كلم لعلك ماتجيب الغنايم