عقب الصداقه والموده والأخوه يالخوي
اليوم اشوفك منت الأول كيف في بالك طرت ؟؟
أنك تحد برفقتي يم الطريق الملتوي
والمشكله نفسي عقب عشرة عمر توها درت !!
لاني ضعيف ولا قوي دام أن حيل الله قوي
تظهر ليالي مقبله بعد الليال اللي سرت
تجري حذافير الزمن مابين ني ومستوي
وأنا مجاهد يازماني لو حذافيرك جرت
يبقى الشموخ بهيبته في قلب رجال بدوي
وتبقى الجروح بنزفها حتى و لو إنها برت
تبرق سحابه عابره ورعودها تدوي دوي
ومن فوق صحراء طاري النسيان هلت وأعبرت
طويت صفحه من زمن وسط الزمان المنطوي
وفي داخلي عزة ملك ربيتها حتى أكبرت
والحمدالله من قراح العز أشرب وأرتوي
وتكتب يديني للشعر وعيون من أقصد قرت
ذيب المفارق في سنام المعرفه قام يعوي
والليله اللي ذيبها عاوي تولت ثم سرت
وألحين قلي ياصديقي يارفيقي يالخوي
وشلون نفسي من بعد عشرة عمر توها درت ؟؟