مايســـولف بالســــوافل غـــير سافل = والأعــالي شـــأنـــــها غــــير الأسا فل
والعــوارف ماتجــــــــي منـــــها الذوارف =صـــدق وإلا كــــذب شيمة كـــل ثافل
ولا طمس بيــــض الحقائق غير بايق= نيـص غارن من نهــــــار الحــــــق جافل
يدفعــه حـــب الظليــــمة للظليمة=الخــــسيـــس اللي عليــــه إبليـــس قافل
مابذاته وجــه حـــق ولاحـــــقيقة=مع غــــــــواه بساحة الشيطان حافل
باع في مستنقـــــــع العيب الكرامة=كــــــــل وقــــــح فـــي ردا دنـــــــياه رافل
غير عيب في وضــــيع العــلم يسعا=ما الــتزم بالفــــرض ويصــــــــلي النوافل
من سعى بالظلــــم معروف مصيره= يحــــــسب اللي خلــــــــقه إنســـــان غافل
مفتري لكـــــــــن ترى ربه حسيبه=العظــــيم اللـــي لكـــــــــل الناس كافل
والدسيسة شيمة النفس الخسيسة=والجــــبان اللي قــــــصر عن كـــــــل نافل
بس مهــــما حاول التشــويه كاذب=جــال حـــــين ما انثنى سير القوافل

يالله يالله ياللـي مالنـا غيـر انـت معـبـود= سبحانك انت العظيـم اللـي عليـك الاعتمـادي
يالله يالله ياللـي مالنـا غيـر انـت معـبـود= سبحانك انت العظيـم اللـي عليـك الاعتمـادي
يامالك امر الوجود الخلق تفنـا وانـت موجـود= باقي وتعلـم خفايـا الكـون واسـرار العبـادي
يارب اسالك رضاك ولامـدى حسنـاك محـدود= اخشاك وارجيك تهدينـي علـى درب الرشـادي
مومن وفيك استعين الى لحقنـي هـم والهـود= مـولاي رحمـاك ياعـلام ماكـنـه فــوادي
قمت اتفكـر واديـر الفكـر والتفكيـر مشـدود= محتار يزعجنـي الممشـا ويزعجنـي قعـادي
مترددٍ كني ابحث بالزمـن عـن شـي مفقـود= مدري على أي اتجاه اسير وجروحـي جـدادي
استدرج الفكر ذعـذاع القصيـد وهبـة النـود= نفـح المشاعربنـود الشعـر عطـر كـل وادي
خيل بفكري خيال الشعـر كلـه بـرق ورعـود= وانقاد مـن هاجسـي منشـاه ياليـل الهجـادي
يتعبني الشعر واتعب له ومثلـي عنـه منشـود= في وقت قل اعتبار الشعر مـن كثـر الـدوادي
في وسط سوق المزاد ونوب معنى النقص والزود= كم سبب الهذر عسر الهضـم حتـى بالـروادي
لين اصبح المدح ذم ولااصبـح البـارود بـارود= ومن لايعرف الفتيله ماعـرف ويـش الزنـادي
مدح الردي ضعف نفس ولاالردي بالطيب مشهود= وارض الصبخ من حرثها خسر حرثه مااستفادي
هذا وانا لي هدف واضح ولي هقـوه ومقصـود= معني ومعنـاي رمـز العـز والعلـم الوكـادي
اعن جزل المدايح فـي شجـاع ينطـح الكـود= والمدح له منطـقٍ عـادي لكنـه غيـر عـادي
سلام ياخصلـة العـز القديـم ومنبـر الجـود= وجـه المـروه وميـزان الادب راع الشـدادي
ياراس من روس يام اللي لهم تاريـخ وعهـود= تاريـخ كتبـت سطـوره بالرمـاح وبالهنـادي
وعهود ماخامرة للبوق طـول البيـض والسـود= الا ان فيها بياض الصدق عن سبـر السـوادي
ياعلي واسمك وسام الشعـر معـروف ومعـدود= ياحافظ له بياض الوحـه فـي بيـض المبـادي
تستاهل المدح يابن بـلال لـك مثنـي ومـردود= عليـك والشعـر لامنـي شديتـه فيـك شـادي
قلته وانا لي شمـوخ وعـز ماغنيـت مضهـود= وافخر بربعي سلايل عبس مع حضـر وبـوادي
اليا تفاخـرت فـي ربعـي نقـا مافيـه منقـود= ومن لاحفظ منسبه هافي وبـن غـادي وغـادي
الله يديمـك ياابـو سلطـان ماطيبـك بمجحـود= ورثِ ورثته تجـلا مثـل وجـه النـور بـادي
ماقلت بك غير فعلٍ منك مثـل السيـف مجـرود= وثيقةٍ ختمها بالصـدق عـن بعـض التمـادي
والحمد باهل الوفا مثلك ياابو سلطـان محمـود= وميدانك اكبر من اللي فيـك صفتـه باجتهـادي

ياالله يـاالله ياللـي تقضـي الحاجـات وتجـود= اسالـك المغفـرة والعـز والهـرج الـسـدادي
يامالك الملك ياذا الكـون منـك العـون معهـود= امنت بـك لاالـه الا انـت حقـق لـي مـرادي
البارحه كنـت ساهـر والمـلا هجـاع ورقـود= صار السهر للعيون احـلا والـذ مـن الرقـادي
يوم استهليت عشرين وخمس من اجمـل الخـود= يا مطيب الرابعه والخامسـه حسـب اعتقـادي
ما كنها الا مهار مـن بنـات حصـان صاهـود= الا انها من رشيـد وعبـس والمجـد السنـادي
حورٍ مهرهن بصدري من زمـان فـات ملحـود= رصيد شعـر كمـا كنـز الذهـب ببـلاد عـادي
للـي بعثهـا نبـي الله سليـمـان ابــن داؤد= ساعة كشفهـا بمـا فيهـا دفـن ذيـك البـلادي
عساني اكسي جزيلات المعانـي جـوخ وعقـود= حيث انها مـن نديـم ينطـح الواجـب عمـادي
بيني وبينه كمـا قالـوا ثمـان سنيـن ياحمـود= والله نشد عن معرفـه يـوم والمعـروف قـادي
يامرحبا من هجـوس شربهـا صافـي وقرهـود= ياوافي مـن رجـال العـرف خطـلان الايـادي
الله يحييك يـسعـدان بـن عابـس راع الفـود= ترحيب معنـاه للصاحـب حـزام الـى الثنـادي
حاضر بحاضر بدون محايـلات ونصـب ووعـود= ابشـر بعـزك ليـا حـدك مـن الايـام حـادي
انا ادري انك ولـد لابـه لهـا عـادات وجـدود= زيزومها عنتر العبسـي علـى سـرج الجـوادي
لابتـك وسّامـة الكفـه لهـا تاريـخ وشـهـود= يشهد لها الحوض ووروده على عاشـر وحـادي
وانا ادري ان كل صابر لـه امكانيـات وحـدود= والصبر محمود لولا الصبر ما عـرف المهـادي
وانا ادري ان اكثر الوافين حضه حـض مقـرود= في عصر جوع الكريم وشبعة الهيـس الربـادي
ما قصد بها كل منهوفي غنـا وسهـود ومهـود= بعض الرجاجيل مـن زود الغنـا بالطيـب زادي
وكلا من الناس من مجناه يبـداء منـه ويعـود= لا بـدّل الله ثيـاب العـز بثـيـاب الـزهـادي
افضّل الموت من حربـه ومـن كيلـه وعبـرود= ولا كما قيـل تستسقـي البحـور مـن الثمـادي
وان شفت مسيود مصبح سيد وامسا السيد مسيود= احس بالغيض مهما هاضنـي صـوت المنـادي
وان شفت خلة عزيز القوم من حاسـد ومحسـود= ادعي على بعض نـاس مالهـم كثـر الجـرادي
ياحيف ما كن مع بعض الرجـال قلـوب وكبـود= لا ينقصـون العـداد ولا يـزيـدون الـعـدادي
والله جعل للقصائـد والرجـال اسـرار وسـدود= معك السعد يـا مبشـر بالعشـا قبـل الهـدادي
راسك ويمناك ولسانك مـن اعـلا راس مرجـود= راسي وشامخ وزبن وفيـه شـرب وفيـه زادي
هذاك مجناك يا منصا الضيـوف جمـوع وبـدود= تنصاك مـن كـل الاقطـار القريبـه والبعـادي

راكب اللى وصفها معروف من عوص النجايـب= وصفها مثل الجنيـه اليـا صفـا وزنـه ولونـه
من سلايل جيش عيال الـزول زينـات الركايـب= وسمها الكفه ياحـي الوسـم واللـي ياسمونـه
ربعـت بالـوادى اللـى علتـه غـر السحايـب= الشعيـب اللـى مفرقـة الـولايـف ينزلـونـه
الشعيـب اللـى مفرقـة الـولايـف ينزلـونـه= الرسن فى راسهـا كـن الصحافـه يرسمونـه
روحـت تلفـح سفايفهـا مثـل شقـر الذوايـب= فوق من كد الجدايل لين مـال (ن) مـع متونـه
كـن بيـن عيونهـا لادرهمـت نـار ولهايـب= تشبـه لذيـبٍ عـدى وعيونهـا تشبـه عيونـه
اشهب السرحان وان جاء بين وديـان وجذايـب= مع تخاتيخ الخلا والقيـض يابسـة(ن) شنونـه
روحت مع خايع (ن) تذريـه صلفـات الهبايـب= تقل تاخذ مـن صحـارى نجـد بيديهـا نمونـه
فوقها المندوب فـى عزالشبـاب وتقـل شايـب= شايب(ن) على الشجاعه والكرامـه والخشونـه
قال انا راعى الذلـول وبالرسايـل عنـك نايـب= وبن عابس ياذلولـى لاتغيـب الشمـس دونـه
وبن عابس شاعرٍ من عبس عطبين الضرايب= شاعر كن الذهب واللول يصـرف مـن لحونـه
من هل النخوه مقابيـس العـدى يـوم الحرايـب= من يصيبونه بأصابـه مـات مابريـت طعونـه
بالحميه يرفعون الـراس مـن حاضـر وغايـب= الصـديـق يفرحـونـه والـعـدوا يكرهـونـه
وللخـوى والجـار مافيهـا جـدال ولاطـلايـب= لويعيـش العمـر كلـه مالقـى حـي يخـونـه
المقابيـس النواحـيـش الذوابـيـح العطـايـب= الرصاص اليـا رمـوا بيـن الاحجـه ينقفونـه
مايهابـون الخطـر و المـوت لوالـدم رايــب= لو يباع المـوت ف نهـار الحرابـه يشترونـه
دون ابانـات العذيـه والشعيبـيـن الخصـايـب= القهـد والـوادى اللـى يبسـت الاريـاق دونـه
ومن شمال من المدينه شمـخ السـود الرقايـب= وضلع(ن) ابيض مثل غر المزن فوق الغيم لونـه
والرجوم السـود وفيـاض الضحايـا والزرايـب= منوتى ومنـاى شـوف الـدار واللـى يدهلونـه
احتموهـا يـوم دورات المغـازى والكسـايـب= كل عـد(ن) فـوق زينـات الركايـب ياردونـه
وردوهن صافي الماء والقمـر بالقيـض غايـب= والبلا فرقـى الوليـف مـن الوليـف يفرقونـه
ولايصح الا الصحيح ومن يقـول الكـذب خايـب= والرجال اهل الوفاء وعلـم الوفـاء مايجحدونـه

مرحبـا ماهـلّ همـال الحيـا والجـو طايـب= من صدوق النو وسميـا ً مجاهيمـم ٍ مزونـه
ساقه الرحمن خلاق البشر جـزل الوهايـب= بارقـه يفـرا ظـلام الليـل ..ويبـدد سكونـه
مرحبا ما هلّ وبلـه وارتـوت منـه الرغايـب= وماتبين بـاذره بـأوراق عشبـه فـي حتونـه
بالرسالة والذلول ومن عليهـا يـا اخـو ذايـب= والقصيد ومن تذكّـر طيـب ربعـه يذكرونـه
والشعور الحي يحيي والعرب مخطي وصايـب= شانهـم شـيء ٍ يعرفونـه وشـيء ٍ يجهلونـه
والتجاهل من سمات ابليـس ملعـون الصلايـب= الله انـه يلعـن الشيطـان والـلـي يتبعـونـه
الشجاع يقول قـول الحـق مايخشـى السبايـب= مايمـوت ابـه الضميـر ولا يغرنـه ظنـونـه
انت يا الي بالوفاء والطيـب طيّبـت الطرايـب= مفردات الشعر وهجـوس ٍ بخافيـك مخزونـه
صافحتني منـك غيـداً ماشناهـا منـك عايـب= شرفتني وانت مفهوم الشـرف ..تـدرك فنونـه
ياشريف الـذات والمبـدأ فـدوك مـن الزلايـب= ناقصين العرف والمعروف ..عشـاق المهونـه
ياذويب كل راعـي عـز مايرضـى الغلايـب= والجبان يعيش عيشـة ذل ..والنفـس مغبونـه
ماثبـت غيـر الجبـال ولاتطيـح الا الـزرايـب= الجبل ما هـزت الأريـاح ركـن ٍ مـن ركونـه
وانت مرسالك وصلني فـوق طاويـت الخرايـب= الأصيل اللـي لزيـم اشدادهـا تبـري شطونـه
قلـت يالله حـي راعيهـا وياحـي الشبـايـب= مفردات ٍ مـا بهـن شكـوى ولاطلبـة معونـه