يالخـياري كـيف حالك بعـد ذقـت الزاجه = بس بشرني عساك بخـير كيف احوالك
ان سلمت انحش وكب العجوني وعلاجه = احـمـد الـله يــوم ربـك سلـمـك لـعــيالك
ونــتـبه لاعــاد تسـمع هـرجـت الـهراجه = من هرج لك بالدواء قل كل دواك لحالك

ورد سعود

سـلمـك ربــي ياسارق مـهـنـة الحـواجه = وأبشر إن سعود طاب الله يطيب فالك
يامـدخـلـني بدرب(ن) يـجهـلك مخراجه= ياموردني لحوض الموت وش قلنالك
لين طـعـم الـموت جربـته ومـالـه حاجه =فـكـرة الزاجه طـلبتـك لاتجي في بالك

مابـغـيـت اواخــذك بالـكـلمـه المنعـاجه = غـلطتن وحده يابوفارس تراها فدالك
حـط راسك ياولد عتقاء على الكرفاجه = بعـد هاذي والـله اني شاربن فـنجالك
يـوم خـليـتـك لسـكـان الـقبور تـواجـه = اسـتـلـم مـني مـرد البــيت في جـوالك
ميرطع شوري وخل اعصابك بثلاجه = يـوم مـاميـزت مخـراجـك قبل مدخالك
ابـك انا لانـي لابن سينا ولابن مـاجه = ابـدوين لـوتركت ادواي كـان اشوالك