يا للـه انـا طالبـك عفـوك وغفـرانـك==يا والـي النـاس خالقهـا ومحصيـهـا



رب السـمـاوات والـقــرأن قـرأنـك==بــدّل بسيـاتنـا حسنـات تمحيـهـا



وبا اصخر القاف يا (ماجـد) على شانـك==أبيـات تلقـى هـدفهـا فـي معانيـهـا



الديـن خلـه بكـل اوقـات عنـوانــك==مـن ضـاع دينـه حياته وش يبي فيهـا



لايختلـف عـن طريـق الحـق نيشانـك==والطيبـه خـلـك اول شخـص نـاويهـا



اللـه يحفظـك تحفـظ حـق شيبـانـك==لاجلـك ولاجـل إخوتـك سهروا لياليهـا



أفـراحنـا تختفـي لا زادت احـزانــك==ويضيـق فينـا فضاء الدنيـا واراضيهـا



ون صـرت مسرور يصبح شاننا شانـك==سعـادتك فـي كثـيـر المـال نشريهـا



واللـه وصـاك فـي جارك وضيفـانـك==مـن جـود جودك من الماجـود يكفيهـا



وتـرى خـويـك حقوقـه بين حجانـك==تكفيـك قصـّـة نـويشـي كان توحيهـا



ارحـم قـرايبـك واحذر زلـت إلسانـك==كـم واحـدٍ قـال كلمـه وابتلـش فيهـا



وسـط المجالس حـذاري يفلت احصانك==تضحـك بـك النـاس قاصيهـا ودانيهـا



زلّـت رفيقـك عليهـا ضـفّ جنحـانـك==مـا دامـهـا تنبلــع ليـّـاك تبـديهـا



والـى طفـح كيلهـا عن كـفّ ميزانـك==شـاور لبيـبٍ حـكيـم الـرأي ينهيـهـا



عمـك وخالـك وابـوك وجـد جـدانـك==رجلـك علـى نهجهـم ثبـت مـواطيهـا



ون كـان تبغى الشرف في صحبة إخوانك==الـمـرجلـة مـا تهيـا فـي تمنيـهــا



واصـل تقـدمـك والميـدان ميـدانـك==اصبـر علـى مـرّهـا يـاتيـك حاليهـا



العلـم يـرفع ابنـاك بـدون عمـدانـك==والجهـل يهـدم بيـوتٍ والعمـد فيـهـا



إلـى امتـلى الجيب كل النـاس صدقانـك==والكـل يتبـع هـواء نفسـك ويرضيهـا



لـو قلـت للكـون عطنـي رأي سكانـك==قـال انـت كـل البشـر كلمتـك توحيهـا



والـى فضـى الجيـب راحـو كل خلانـك==كنـك بـدارٍ خـلاء مـا ينسكـن فيـهــا



لو صحت ونبـحّ صوتك ما نقضى شانـك==كـن البشـر عايشـه مـن دون اذانيـهـا



راعي المصالـح عسلـك وسـم ثعبانـك==وان مـا لـقـى حاجتـه قيمتـك يهفيـهـا



واستثنـي اللي إلـى شان الدهـر زانـك==نفسـه علـى الطيـب والفزعـه مضريهـا



هـذاك تفـداه فـي لؤلـك ومـرجـانـك==والــروح لاجـلـه تبعـدهـا وتـدنيـهـا



ودمتــم سالميـــن



اخوكم ابو مازن