شكرا على جهودك
واتمنا لك حياه سعيده
وهذه قصيده لشاعر عبدالله باتل
سرى بليل وبرق وانغام ونجوم * وزرى على اللي مهتني في منامه
جا حافلاً غربه من المزن مردوم* وشرقه جزر مزنٍ تبدد ركامه
>ساعه بفخت وساعه أخرى بعلجوم * يقمر ويديجر عجيباً نظامه
>بأرضٍ غطوشٍ سملقٍ مابها احزوم *جبوب سبروتٍ مليحٍٍ ثمامه
>يفهم وفاهم ومتفاهم ومفهوم * وان كنت منهم فانت عندك فهامه
>راودني الإحساس باسلوب مظلوم * وتوسلتني عاطفه بانسجامه
>قامن يحثني على سر مكتوم *وابطى وصار إبداع عقب انكتامه
>لامفاخرٍفيها ولاني بموهوم *ركبت ركوب اعقال فوق العمامه
>سبحان رب الناس حاكم ومحكوم * اللي نهاره يسلخه من ظلامه
>ربٍ عليه الرزق للصقر والبوم * مراح رزق اغراب يم الحمامه
>ياشامت اشمت مدرا عنك مشتوم * ولايجني الشمات غير الندامه
>والذم مايستخدمه غير مذموم *ولاهي اطبوع ارجال فيهم شهامه
>ولاصار حقك عند غالي ومهضوم *عليك تصعب فكرة الأنتقامه
>ولاجاك يشكيلك من الضيم مضيوم * ولو جاك يمكن ماتحقق مرامه
>وبعض الكلام ليانحبك حبك مسموم *ودايم يغسل المخ سحر النمامه
>وكلش يروح وينسي بعد كم يوم *وكلش يسامح غير جرح الكرامه؟؟
>وبالناس متعلم ومحتاج تعلوم *وفيهم بليدٍ مايسوي طعامه
>وظمير غايب عنده اخبار واعلوم * جرب وشاف وصار عنده لمامه
>ماتقعد النمات عنده ولاتقوم *وعن قيل والاقال طق اللجامه
>ماهمه الحرمان لو عاش محروم *الالياناظر رشيق القوامه
>أبو العيون السود والخصر مهضوم * خشفٍ تحت خده من يسار شامه
>هادي طبع مافيه خفه ولااوجوم * بكلمته وبنضرته وابسامه
>عفٍٍ عن الهفوات مكرم ومحشوم *يمشي واهو واثق ومرفوع هامه
>من ناس تحكمها تقاليد واسلوم *عبقٍ ولبقٍ خندريسٍ غرامه
>حبه شغفني شغف جارح لعيسوم * وساوى الدروب العوج بلأستقامه
>ياما عليه أرقبت في راس مزموم * وياما عليه الجرح طال التئامه
>وعني بعيد وفيه لااشري ولا اسوم * أبعد من سكاكا عن اقصى تهامه
>ودعته آخر يوم وانكفت مشئوم * وانّا تفارقنا ليوم القيامه
>مشيت كللي حيرت اهموم واغموم * وتركت قلبي عهدةٍ باستلامه
>احن له حنين كوماً من الكوم * شافت ولدها ذبح باقصا العدامه
>بين اربعة شجعان عجلين وقروم * ماتقومله من جوه في شر قامه
>اثنين طشوا مايعسرهم من اهدوم * يبغون عنهم ينجزونه شمامه
>وواحد بسرعه والحطب عندهم كوم * وواحد وقود النار والحمس زامه
>قامت تحن وتلتفت فيه وتهوم * بعد ايست والذود لاذ بعسامه
>ولا يحير امرٍ صار واضح ومحسوم * تحير بامرٍ منفلت من زمامه
>ولا يصير غير اللي من الله مقسوم * وعلى المقدر ماتجوز الملامه
>وماقدر الوالي على اللوح مرسوم * اصبر على المقسوم وارضى انقسامه
>وحاول تصير بساعة الضيق زيزوم * وليا حزمت الشي جود احزامه
>وطير الحبارى يزعجه نوب جرثوم * ولااتفه من الجرثوم غير انتقامه
>وجناح للبعوض وللفيل خرطوم * ووش فايدتك بعرف زرقا اليمامه
>والذيب يبقى ذيب لو صيب بسهوم * والثور ثور ولا يغرك سنامه
>وبالشده الأصحاب تعرف من القوم * وكلن بوقت الضيق يعرف مقامه
>ولاصرت لاعاقل ولا مخرم اخشوم * شخصيتك تصير فيها انفصامه؟
>ومن لايصلي لايزكي ولايصوم * لوهو بمكه محرمنٍ في احرامه
>وبيت العزاز يضل من حر واسموم * وبيت الردى مبناه مثل انهدامه
>ولافيه لهل الطيب واهل الردى اوسوم * والمشكله لو إن فيهم علامه
>والطيب ساس ونفع واصرار واعزوم * ماهو بكثر فلوس والا وسامه
>ومن ماخدم ماصار في يوم مخدوم * وكن تجيه ألفه وميمه ولامه
>ووش جاب ريح المسك ياناس للثوم * والمعرفه وش جابها للغشامه
>لو قلت هذا الشرق لإ نسان منجوم * يصير عنده غرب وقت انجامه
>مالك سوى تنساه وتبعد الحوم * والمحترم حقٍ عليك احترامه
>ومقطع موسيقى باغنيه لأم كلثوم * يسوى رديٍ يبلشك في خصامه
>وان انتصر منصور وان هزم مهزوم * لازم تقول الناس هذا علامه
>ماخلو اللي بالخلى نايمٍ نوم * جوه اقعدوه بخير مدري شتامه
>ولاني بمدح او ذم هالناس ملزوم * أبغى السلامه كان حصلت سلامه
>والعمر لو طالت لياليه مايدوم * لابد مايفنى وتفنى عضامه
>لابد من يومٍ يقولون مرحوم * وبالمقبره يدفن مطوق بخامه
>تفنى ولايبقى على الأرض علقوم * وبالشي يبدا النقص ساعة تمامه
>مات الرسول اللي من الله معصوم * اللي عليه الله ضلل غمامه
>ولا خلت كسرى ولا قيصر الروم * أصحاب تيجان الذهب والزعامه
>عاشوا حقيقه وانتهت كنها احلوم * وافنت بعدهم ناطحين الجهامه
>ومهما وصلت بحال في حال محكوم * لو انت في دنياك صاحب فخامه
>الله يبدل عج الأيام بغيوم * وتمطر بعد ماهي عجاج وكتامه
>تم الكلام اللي من الفكر ملموم * وازكى تحيه والسلام بختام
الشاعر عبدالله بن باتل الرشيدي