أهداء لـ أبو عبيد ..
ياراكب اللي مافي فخامتـه هرجـه
وعلى جبينه رموز لدولـة انتاجـه
جيبٍ ركونه قدم.. واخلاف مدرجـه
يطوي سراميد جرد البيـد منهاجـه
ودك تغني ليامنـه عطـا الفرجـه
(يامل قلبٍ يسـج وفيـه دولاجـه)
الوقـت دوّار والايــام منـدرجـه
كم طيبٍ حوّله من عالـي ابراجـه
ليا قام وقتك يقلـط عوره..وعرجـه
وازريت تصبر على عوجاه..وزعاجه
أمتس حبل اللزوم وقلـة الخرجـه
ودورّ رفيق الرخا حجـه لمخراجـه
نصه حزام الظهر بالساعه الحرجـه
اللي للأصحاب دايم يضحك حجاجـه
على يديه اعتبـر كربتـك منفرجـه
مثل الدوا اللي (يدس) لحزة الحاجـه
تجيه مشدوده اعصابـك ومنحرجـه
وتروح من عنده اعصابـك بثلاجـه
وان قيل بالله من ؟ قل مابها هرجه
مسلط..ليامـن كـلٍ عـد ماواجـه
لافي الغيداني