أثرْك جالك بطين ونبت لك صـرّه!!
يوم أنّي أزهـم عليـك ولاتحاكينـي

ورثت ورث العجوز وجيـت مجتـرّه
وصنفت نفسك من أصحاب الملاييني!

بالله أبنشدْك كم مرّه .. وكـم مـرّه
يجفونك أقرب بني عمك وتاتينـي ؟؟

تشكي من الفقر .. وتعاني من الحرّه
وأقوم وأقسم معاشي بينـك وبينـي

واليوم تركب على المرسدس وتفـرّه
كنّـك حفيـد الأئمّـه والسلاطينـي

لوّك بدال الأمريكـي عالـم الـذرّه
يمديك أكلت الزوالـي والبطاطينـي

يعطيك من خيره !! ويكفيك من شرّه
عقب التكاسي وعقب الفقر و الديني

أن كان نفسك من المليـون منغـرّه
تـراك خسـران فالدنيـا وفالدينـي

الله هو اللي يسـر العبـد ويضـرّه
والا أنته (أربع حروفٍ) بين قوسيني

تراك مازلت تتبعنـا علـى الجـرّه
من عاد حنّا على ظهور البعارينـي

قومٍ يدينـا تحـوش المـال وتثـرّه
على بيـوت الأرامـل والمساكينـي

لو نملك الكون من بحره ليـا بـرّه
مانمتلك بـه عمـارات ودكاكينـي

والا أنت نفسك من المليون منغـرّه
يكفيك .. وأنا بياض الوجه يكفيني !!


منقول لشاعر سلطان الهاجرى