يامير فيك من الخصال الحميده = مكارم فيها توشحت بوسام
طبقتها مبدأ ودين وعقيده = وترسخت عندك على طولا الايام
حسب اعتقادي فيك ماهي جديده = مبنى بليا ساس لو قام مادام
اخذت من حاتم مزايا عديده = بالجود مع فعل الشجاعه والاكرام
كان الوفاء مريوس فنته عميده = يوخذ منك نهجه بصفحات واقلام
رقيت بالعليا مراقي جويده = وتحققت لك ماتريده من احلام
ومتزت في نظراتك اللي بعيده = وبعض الملا نظرتهم عند الاقدام
نفخر وتفخر بك عموم البديده = ويفخر بك العبسي ليا جاك منظام
ان جاء رشيديٍ وحمله يكيده = شلته ولا طاوعت به لوم لوام
مواقفك على فعولك شهيده = تشهد بها كل الاقارب والأقوام
كلنا يبي مثلك ولاهي على ايده = بيدين منهو للخفيات علام
الله يرفع من يشاء من عبيده = وهايبن تعطي لمن حب واقسام
لا من كل قام واحصى ورصيده = انته رصيدك فايقٍ كل الارقام
انت رصيدك بالرجال الرشيده = اللي مواقفهم جسيمات وأعضام
صحيح نطحات المعاني مكيده = تبيلها رجلن بتوعن وجزام
تعلمو ياهل النفوس النكيده = ان الرجال افعال ماهي بالاجسام
تعلموا ياهل اليدين الزهيده = ياصايرين لكثرة المال خدام
تعلموا ياهل القلوب البليده = ياحاسبين الطيب سهلٍ لمن رام
ان المراجل والحياه السعيده = هي بالهمم لا بالتمني والأوهام
العبد ماتبقى حياته مديده = تبقى له السمعه على طول الايام
اهديت ماخطيت في هالجريده = بيضا لبو جاسم على روس الأعلام
ذكري لابو جاسم تبقى مجيده = تبقى على طول الليالي والايام