هلا مرحبا بالضيف واللي معه حضار= تراحيبنا للضيف عادة وفطرية
نرحب لياجاء الضيف ولا الخوي والجار= تراحينا بالصدق ماهي بمخفيه
هلا مرحبا باللي لهم عندنا مقدار= هل الطيب والميقاف لاكبرت الهية
حضرتو لنا تشريف ومنورين الدار= وكل الرجال اتشرفه مثل هالجية
اقوله باسم راعي هلا مكرم الخطار = محمد ولا يحتاج تعريف مولية
ليا عدو اهل الطيب له مقسم وشعار= فعول المراجل كسب يمنا ووراثية

سلام تسليم الرجال الوفيين=في ليلة تشبه مثل ليلة العيد
جينا على الدعوة حضور(ن) ملبين =على الوعد مع صادقين المواعيد
شرواك تقديره على الرأس والعين =يستاهل اللي ياصله لوهو بعيد
اكرمتنا في دعوتك يابن عجوين= ولاهي غريبه منك يامحمد عبيد
انتم هل الواجب رجال(ن) مسمين= رجالكم يرسي كما نايف الحيد
في واجب الاكرام قوم(ن) كريمين=بصحونكم روس الغنم والمفاريد
يابواديب انت الادب والنباء الزين =ومدحي لشخصك لاينقص ولايزيد
ابوك وعمامك على الطيب ضارين =من روس شيخان الرجال الاواليد
وخوالك اللي بالزوم معروفين= ابناء هديرس من رجال(ن) صناديد
عرفتهم وقت القسى وساعة اللين= ونعم المعرفه طيبين المواريد
جزاء وجهز وسعود بالقلب غالين= مني لهم صدق الاخوة تراديد
يالله عساهم بالحياة متعافين = اطلب لهم من عالم الغيب وازيد
وختامها ياالله عساكم غنيين = يامكرم الضيفان يامحمد عبيد

جاني من محمد عبيد عقيل الشهم اتصال=وفزيت للطيب وحييته بمثل اتحيته
فرحت لانه معودني على كثر الصال=راعي وصل يالله عسى حسناه تطمس سيته
قلت انت حولي قال لا عندي لشرواك احتفال=ولازم تجي قلت انت من كلي فخر في جيته
يقول عندي ليلة الجمعة كريمين السبال=قلت انت من طيبه على غيره فرض شخصيته
ايقنت بان العذر ماله عن هل الاجب مجال=وجيتك ولافكرت في كثر العذر وشويته
سقت الركاب ملبين دعوتك يامنصى الرجال=لرضاك ياللي مثل لون الشاش الابيض نيته
لانك من رجال(ن) معرفتهم رصيد ورأس مال=ومن بيت عز(ن) يامن الخايف لياجاء فيته
طيبك يابن عجوين من عجوين الاول لايزال= ولبست ثوبه عز ياسيفه وياجنبيته
العيب فيك انك على قلك عدو(ن) للريال = دون الكرم في عينك المليون قيمة ميته
والعيب الاخر الياكرمت اشبعت وفنيت الحلال=ويالله من سكينك الراعي يفك رعيته
من الكرم حطيت لاسمك بالكرم مضرب مثال= مع من تحلا غصب بأخلاق الكريم وهيته
ماقلت روس اقلام من ماحيت مدح به يقال=وشلون لواعطيت هاجوس الشعر حريته
وقبل الختام من القصور العذر يااف الخصال=ياراعي الكف النديه والكرم ماريته
وقول يالله يالكريم اللي لغيرك مانسال= بارك لابن عجوين في ماله وفي ذريته