من غلطة العمر أثقلت منكبيه
والقيد والسجن والسجان والمحكمة
يا رب عفوك ولا غيرك يا رب ارتجيه
أنت أعلم الناس في عبد ضعيف ارحمه
القيد والسلسلة في ساقه وفي يديه
والليل لا حلّ حل الموت تحت لحمه
القبر قدام وجهه والكفن يحتريه
والسيف قدام عينه غايص في دمه
أخطا بساعة غضب وإبليس من يقتفيه
يرديه والذنب يا كبره ويا معظمه
يالله عفوك وغفرانك وعتق يليه
توبة من الذنب من عبد ذبحه ندمه
يالله عليك الفرج والعبد من بيحميه
غير أنت ياللي تعلم السر ما نعلمه
تكفون ياهل الظفر والجاه وأهل الوجيه
اللي ابتلا في الزمان الشين من يرحمه
ازهم وكل على فعل الجميل انتخيه
تكفى يا "هادي" والأجر من العظيم اغنمه
اعتقني لوجه ربك لا تفكر بليه
أنا تحت فيّة ايدك وأنت أبو المكرمة
والله ما بيني وبينه قضى واحتريه
ولا نويته بشر في الخفوق اكتمه
ساعة غضب تجعل الرجال مثل السفيه
تحداه للذنب لين انه يضيق نسمه
تكفى يا "عايض" وفضل العتق يبغى نبيه
والعبد للخير والمعروف من يلهمه
يابو علي اشتر الجنة مع والديه
في ساعة يفرح المؤمن بما قدمه
هذا نداء من سجين من بغى يفتديه
يسعى لوجه الكريم اللي يفيض كرمه
9