أنا ما أخطيت في حقك ولكن الكلام عتاب
أعاتب والعتب كلمة تفسرها معانيها
أعاتب وأحسب بهرجي الا مني حكيت حساب
وكلمة يستحي منها لساني يبتدي فيها
وإذا أنت من العتب تزعل علينا وبتصك الباب
ترى مانيب قاصدها ولاني فيك ناويها
ولا ودي على الفرقا وقلبي داخلي مرتاب
أشوف إن الهوى خدعه وأشوف القلب راضيها
وأشوف إن الهوى فرقا مواليف وعناد أحباب
وأشوف إن الجفا خطوة ولاني قادر أخطيها
وقلبي لو عشق يخلص ولوطالت عليه رقاب
وتشهد له دروب الحب حاضرها وماضيها
عشقنا والهوى حسرة ومشينا والأمل كذاب
بدنيا نابني منها قليل من بلاويها
عرفت الحب من عمري صغير بالغرام وشاب
وقلبي للحبيب أكبر من الدنيا ومافيها
صحيح إني نويت أبعد ولكن الهوى غلاب
وهي رحلة بديت بها ولا أدري كيف بنهيها
تحريتك شروق الشمس وشفتك للشروق غياب
ولاأظنك تبيع العشرة اللي كنت شاريها
بقى لي بالهوى نظرة وتغريبة ودمع أهداب
وقصة بترك لسانك على العذال يرويها
وأناجي باقي حروفي وآلف للفراق كتاب
قصايد تملي أوراقي أرددها وأغنيها
وإذا مرتني الذكرى وجرحي بالحشا ماطاب
بتبعدني وتدنيني وببعدها وأبدنيها
وأنا عيب علي أشكي من الدنيا بدون أسباب
مدامي ماخذ منها يجيني يوم وأعطيها