ماكل عكف الشوارب طيب مفتوله
كل شارب له مقص اليا قصر طاله

والناس للناس شياله ومحموله
ولا كل حمل يبي يقواه شياله

بعض الحواجب على الطولات مفلوله
وبعض الحواجب على العثرات نزاله

والحر إذا ما أرتفع مايقبل نزوله
والبوم لو يرتفع بالقاع منزاله

نفس من الوقت والايام معلوله
ونفس عليله من الرجال وافعاله

من يرتجي من سحاب الصيف هملوله
يموت ضامي قبل يذوق هماله

والرجل لا صار شيخ وابن حموله
يضفي على الربع والمحتاج بجلاله

والمهبد اللي يرد القوم في قوله
مسرد حكي في مجالس ناس حثاله

حمامة الوجه من يمناه مقتوله
ما للحيا فيه دم يشربه فاله


ليته عطى صغر عقله من كبر زوله

او ليت زوله نفع من لاذ بظلاله

خبل يدربي سلوم البدو بنعوله
يطيح قدره تحت رجليه ماشاله

أبواب كل المراجل عنه مقفوله
والنعم كايد عليه ولا يتهيا له

مثله إذا ما استحى من هالبشر حوله
على الأقل يستحي من ميلة عقاله


لكن نصيحه لوجه الله قولوا له
لو يلبس ثياب اخته يمكن أشواله