يا حاضن البعد .. والفرقا مربيتك
مشوارك بعيد .. ماتوصلك خطواتي
لو أقدر اشاهدك لحظة زمن .. جيتك
أنثر لك الشوق .. ورد يلملم شتاتي
صدقني اني .. من الاعماق حبيتك
من كل قلبي .. ومن روحي .. ومن ذاتي
لو كنت ما احبك .. اهملتك وخليتك
ماشفتني في غيابك .. قاعد احاتي
وأنا أدري أني .. مامريتك وهميتك
ماشلت همّي .. ولا همك علاقاتي
مع كل هذا .. وانا ساكت ولا اطريتك
مع انك اكبر .. حدث يشغل مساحاتي
النبض شاريك .. والانفاس شاريتك
والشعر واصدق قلم .. والبوح وأبياتي
نشفت دم الغياب .. وماتناسيتك
لازلت بالذاكره .. واسأل كتاباتي
يا ليتك تحس باحساسي معك .. ليتك
تفقدني أيام .. وتجرب معاناتي
تشتاق لي حيل .. وانا ماتحريتك
تموت فيني .. وتحيى في ملاقاتي
وانا ولا ادري عن .. ابكاك وتناهيتك
لاأول طموحاتي .. ولاآخر طموحاتي
وان مر طاريك راح .. وماتفدّيتك
له أتجاهاته .. ولي اتجاهاتي
احساس تنهار منّه .. جلّ عافيتك
تبي دليل .. انظر عيوني ونظراتي
تدري وش امنيتي .. أمرّ ناحيتك
صدفه .. على شان بس .. ألملم شتاتي
واصد وأقول في نفسي .. ماهو بيتك
هالقلب قلبي .. وهالنبضات نبضاتي