هاض الغرام وبيح القلب مافيـه = وبيحت انا حبٍ بقلبـي سطابـه
على حبيـبٍ كـل يـوم اراعيـه = اعطى السؤال وجاه مني جوابـه
الله يلوم اللي بليـلٍ سـرى فيـه = شاله مع العربان وابعـد ترابـه
ياليتني معهـم وزانـه واباريـه = وليا عطش نسقيه عذبـاً شرابـه
وليا نزل قاعـاً نوقـي مواطيـه = واقيه عن لفح الهوى والسحابـه
واخشى عليه من البروده واغطيه = يرقد بمـان الله ومـن القرابـه
وانا الطبيب اللي معالج واداويـه = حتى يطيب الجرح ويبري صوابه
من عقبها صبري ولاني بقاويـه = صبرت لين الصبر بين سرابـه
واسهر طوال الليل يا ناس راجيه = وون ون اللـي عـزف لربابـه
واعوي كما ذيبٍ بعالي مراقيـه = بروس الهضاب اللي رقتها الذيابه
والله ثـم والله مانـي بناسـيـه = مانساه لو سلـط علينـا الرقابـه
تبعد دياري عن دياره شواطيـه = ديرة هلا النوماس ترث الصحابه
وان مت يا الباشا مبين مراميـه = حطوا علي قطعـةً مـن ثيابـه