تبعدك الايام و يجيبك شعورٍ صدوق
و القلب لامن نوى طاريك كله نوى

ليلة فراقك شعرت اني بليا خفوق
و اللي قوى جور وقته يومها ما قوى

ما كان لي حيل اوقف بس وقفت ذوق
ما ودي اجرحك حتى في وداع الهوى

ضاقت بي الناس و الدنيا و كل الخلوق
و العاذل اللي ضما دمع الحبايب روى

هليت دمعٍ من الضيقة لمثلك يلوق
و سجيت في ليلتي حتى نهاري ضوى

دمعٍ نثرته على فرقاك يا شوق شوق
و دموع الانسان ما هي في حياته سوا

يالغالي اللي نسيت انساك بين الطروق
و اليا ذكرتك حيا وردٍ بصدري ذوى

و يا اللي تقدي بنور الخد نور البروق
و يا اللي بشعرك طويت الليل حتى انطوى

غالي و لك في حياتي كل لحظه شروق
و لك بخيالي قصيدٍ شامخٍ ما هوى

الله على الشعر يوم انه بعالي العذوق
من قبل لا ينقطف طلعه و هو ما استوى

من قبل لا يصير سلعه في يدين السروق
و يصير مستشعره شاعر و صاحب لوا

و اليوم شعري كثير و حابسه بالعروق
اخاف ينزف و لا يلقى لجرحه دوا