بديت انا شطر اول القاف..قل إيه=وانهيت ثاني شطره ب قاف..قل لا
من هاجس ٍ بين المحاني مخفّيه=يشع نوره و السحايب تجلاّ
في خافق ٍ بنات فكري قوافيه=سموم حرّه فوق برده تعلاّ
للصاحب اللي قلت له إيه..قل إيه=إذا تراني قلت لك لا..قل لا
أحد ٍ عـزومه ل المعالي تودّيه=واحد ٍ عزومه ل الحضيض إتِّدلاّ
أحد ٍ توده في زمانك تخاويه=واحد ٍ يسرّك يوم صدَّر..و..ولاّ
(يعني لوانه ب الملايين تشريه=وإلاّ تبيعه كُرْهْ ب اقرب محلاّ)
الصاحب الوافي نعزّه و نغليه=أما سواه انقول..كلاّ..و..كلاّ
وختام شعري مع تواضع قوافيه=ما قصدي إلاّ بالخَيَال آتسلاّ
كانك اترجم قولتي لا..قل إيه=إخذ الكلام..إن قلت لك إيه..قل لا