ينتابني مع رعشة الطفل الخجول=غصة حنين وبسمة جروح(ن) دمال
معها اجتمع كل النقايض والمثول=إذا وقفت قبالها..وجهي شمال
تخفي شعور(ن) لاخصوص ولاشمول=لاهو سراب(ن) أو رماد ولا حقيقه أو خيال
واليا بغيت أوصافها..مادري شاقول=مدري شاقول بوصفها عند المثال
اما ..جميع الأسئلة بلا حلول=والا ..جميع الأجوبة بلا سؤال
شيٍ(ن) تخطى قدرتي واقدر أقول=فاق وتفوّق طاقتي..وْ لاَ يزال
من يوم صرت قبالها..طفلٍ خجول=ودي أضمه ضمة(ن) تبقى وصال؟
ريم الفلا..عين المها..العفري جفول=مزيونة(ن) رعبوبة(ن) غندورة(ن) اخت الرجال
وان درّجت..تسمع ترانيم الحجول=عرضة صفوف السامري لامنّ شال
لا من رجف طيرانها راع الطبول=ردت صفوف(ن) في صدى حمر الجبال
وان سلهمت بعيونها..شي(ن) يهول=مااقدر أقول انه بلغ حد الكمال
له بسمة(ن) تلعج بروقه حَب لول=سحر ابتسامة ثغرها السحرٍ الحلال
وليا تنثر شعرها عرض(ن) وطول=فوق الردوف الزاهية زاد الجمال
ما كنها إلاّ مهرة(ن) بين الخيول=تقطع جراهيد الفيافي والسهال
تقدم على شيل الثقيله والحمول=وتفز فزة جارح(ن) وقت النزال
وفريسها للطايلة غصب(ن) تطول=وقت العلوم الغانمة وقت الفعال
واليوم هذا الفارس القرم الخجول=لاهو يغِير ولايبي فتح المجال
يكون ودى مهرته شبك العجول!=ما ظنتي..إلاّ إذا..صابه خبال؟
ممكن يصير إن البشر كله خبول؟=والاّ أنا اللي صابني منهم هبال!
واختم بها صلوا على طه الرسول=مع آله وصحبه وْ تابعينه بالعدال