دوم اتمشى بين ذيك الغراجات
في خايعٍ جل العرب خابرينه
مابين ضبع وبين ملوي وعفرات
أمضى الفتى ياخوك سالف سنينه
ياما تدهوسنا بذيك المطقات
وفرينه الهندل بكلتا يدينه
وياما خذينه بالمقانيص صيدات
عسر الخباري بالدداسن مشينه
وياما لقينا بالبسيطة وناسات
وياما بجلسات الطرايب حكينه
هاك الليال الماضيات الجميلات
مرت ولاكنه خذينه وعطينه
واليوم أنا قلبي يشوف التعاسات
من صاحبٍ ساكن بحد {المدينه}
في قربه أحيا والمحاجر عطيبات
عن شوف مضنون الحشا صابرينه
نذراً لدوس القلب واقطع علاقات
رجوى الذي خله حياتي رهينه
ماهمني حكي العذل والملامات
بسنة الله والنبي طالبينه
ياعل قلبٍ ماشكى بعدهم مات
وياعل ودٍ من حنابه يجينه
احبها كثر الدروب الطويلات
وعداد ما بالكون من مسلمينه
وعداد مارفت على القلب ضيقات
وعداد مابيَّح فؤادي حنينه
شكيتلك من ماضي الوقت سجات
من صاحبٍ شاف التعاسه بعينه
وصل كلامي للعيون الوسيعات
وقله ترانا بالعمر ناطرينه
لو حالت بوصله ظروف ومسافات
لابد ماتمسك يميني يمينه
ويا { موسى } أقبل من جنابي تحيات
ياعمي الي بالوفا عارفينه
من شاعراً صاغ المعاني والابيات
واطلق لكم سرب البيوت السجينه