النقد ما يزعل الشاعر على كل حال = لا صار ما تفتهم بالشعر نقادته
لو كنت من كل كلمة خبل اشد الرحال = ما كان راسي هناله نوم بوسادته
قولوا لمن يتعب افكاره بذاك المقال = بعض السواليف ما انقصته ولا زادته
راع الحيالات لو انه كثير احتيال = بعض الحيالات بالميقاف ما فادته
محبالته ما تصيد ولا تفيد الحبال = خبلن حبلها لغيره والبلا صادته !
ربعه تصفّق وهو يرقص يا لاله يا لال = لبّا الندا يوم ربعه للردا نادته
طرّا عليّ المثايل من قديم الليال = اللي تعوّد لحاجه ما ترك عادته
دلـّوه درب السنع والعقل والاعتدال = وخلوه يركع ويسجد فوق سجادته
لا ينحرف مع دروب اهل الجهل والضلال = هـِدم الصنم وأحِـرقت بالنار عبّادته
والمشكله صدق عبّاد الذهب والريال = اللي ما تقنع بحكم الله وفي رادته
يا متعب الفكر بالنقد! وجواب السؤال = ما من جواب إتــّقدم به لـ نشّـادته
الجزل مثلي ما يرضا الا بنظم الجزال = مبدع وتزداد بالابداع حسّـادته
بكره تبا تشرق الشمس ويزيح الظلال = والقصر دامه جليد بـ حرها ابادته
واللي خطف جنبها بالليل ذيب الجبال = والله لتاخذ سنه والضلع ما عادته
واللي رضا بالردا واخلف دروب الرجال = لا يشره الا على اللي للردا قادته