أضحك وقلبي كثير الهم وجراحه = أجامل الناس والدنيا تلاويني
إيه والله أضحك وأنا ماني بمرتاحه=همٍ سكن في خفا نفسي يكفيني
الحظ غادي ومني ضاع مفتاحة=وماشغلتي إلا يا ليلي آه ياعيني
بكيت حظي وحظي زاد بمزاحه=يلعنك حظٍ نوى قتلي بسكيني
أذيع همي وجرحي أطلق سراحه=يومٍ قصيدي سكن داخل شراييني
أذيعه بقاف نفسٍ حيل نواحه= دايم على صادق المعنى تعنيني
حره ودايم على الجزلات لماحه=مشيتها وين ما تبغي توديني
قافٍ حبكته وأنا أدري النفس نزاحه = جنوب دربي وشمالٍ ناويه فيني
يطري لذيذ المنام وافقد مراحه = أسهر على ضو قمره الله يعيني
مع مغرب الشمس خافي سرنا باحه=يا حيف يا شمس تغرب من سنا سنيني