أبدا بذكر الله عليم الخفـــــــــايا =محيي العظام الهامدات الرميمات
الخالق المعبود جزل العطايــــا =المعتلي من فوق سبع السمـــاوات
رب العباد اللي يغفر الخطايــــا =اليا تاب عبده سامحه بالخطيــات
يأمر بحسنات ٍويدفع منايـــــــــا =ويجازي الظالم بأشد العقوبــــات
مخازنه من كل خير ملايــــــــا =وأوامره تصدراذا راد عجــــلات
ومن بعد ذلك من هواي ورضايا =أهدي لبو سالم جزيل التحيــــا ت
أزفها له من صدوق النوايــــــــا =أعداد ماطل القمر فوق أبانــــــات
وعد النجوم وما مشن المطايــــا = وما غرد القمري بخضرٍ ظليلات
وأعداد مايذبح بوقت الضحايــــا = ومن يرمي الجمره وعد الجمرات
أحلا من الفرحه بغال الدنايـــــا =اليا حضر فجأه بعد قيل له مــــــات
مني لبو سالم حميد السجايـــــــا = هديةٍ مابي وراها مجــــــــــــازات
هديةٍ مابي وراها هدايـــــــــــــا = غير الزياره بالليالي القريبــــــــات
إعجبت بسلوبه وحسن المزايــا = أخلاق سمحه والنوايا سليمــــــات
من لابةٍ تارد حياض المنايــــــا = حمر النواظر كاسبين النفــــــالات
زيارته قصدي وغايه إمنايـــــا = نبي نخلدها اسنين طويـــــــــــلات
تنظم للأرشيف مثل الوصايـــا = وتحيا مع الحيين من بعد الأموات
حيث مزاور من أجل الهدايــــا = بين الرجال أهل الشيم والمروات
لعل أبو سالم يحقق منايــــــــــا = يقول لي تمت بليا مــــــــــراوات
أيضا ولاننسى بعيد الهقايــــــــا = عبد الله الرفاع راعي الجميلات
رجل الوفا مابه علوم وحكايــا = ميزان حق اليا مشى بالمهمــــات
وليا حصل تعقيد بعض القضايا = يحلها بأسلوبه المستحبـــــــــات
مايشجع المخطي كثير اللوايـــا = إلا بتهدية الغضب والمســـاوات
زيارته معكم مناي وهوايـــــــا= الله يحيي الكل من دون خصات
وتمت بذكر الله عليم الخفايــــا = محيي العظام الهامدات الرميمات

أبدا بذكر الله بديع البرايــــــــا = الواحد المعبود رب البريـــــــــــــات
خالق جميع الكون باد البدايـــا = بأمره يكون العبد عدل المقــــــولات
المعطي المانع بليا وصايــــــا =مجري سفينة نوح في وصت غــبات
منزل القران عدل القضايـــــا = وناسخ ملل أهل البدع والضــــــلالات
يالله ياكاسي عظام عرايــــــــا = يامخفف ثقل الهموم القويــــــــــــــات
خفف حمول المستحين الطوايا= أهل الشيم والجاه واهل الجمــــــالات
ومن بعد ذلك من صميم الحنايا = أهلا هلا باللي لنا يرسل أبيـــــــــــات
يامرحبا ببيوت جني نصايــــــا = جتني نصايا من زبون المهمـــــــــات
من عند أبو مصيلح كريم السجايا = صلحان مايخفى عطيب الضريبات
يامرحبا باللي يسوق الهدايــــــا = ترحيبةٍ تثنى ملاييـــــــــــن مـــــرات
اعدا مايجري على الارض مايا = واعداد مايلهج ملبي عرفــــــــــــات
وماطافو الكعبه طوايف حفايــا = وما داج بالمسعى من الناس زفـــات
واعداد من صلى وساق العطايا = وصام رمضان وتابعه بالعبـــــادات
وماسال وادي وعاليات الشغايا = وماتنبت التربه بذور النباتــــــــــــات
باللي يبا منا نزوره سوايـــــــــا = في منزله عجل بالليالي القريبـــــــات
واقول حاضر بالزياره ترايــــا = واصلك ياصلحان مابه روايـــــــــات
وحنا على رد الجمايل ظمايـــا= حاضر بحاضر والتماهن رزايــــــات
وزيارتك حق علينا رضايــــــا = ناصلك لو دونك بعيد المسافــــــــــات
قصدي وفا بالوعد ماهي دعايا = وحيث الزياره من عظيم المحبـــــــات
يامورد الهياب حوض المنايـــا = اللي كلحن أنيابهن ورجاء فــــــــــــات
من لابة ٍ سقم المعادي طنايــــا =اللي طوحن البيض من خلف الأصوات
ثم زغردن باصواتهن والنخايا = يردون حوض الموت عجلين صفـــات
وتمت بذكر الله بديع البرايــــــا = الواحد المـــــعبود رب البريـــــــــــات
وصلوا على محمد شفيع العرايا = اللي بعث بـالحق شـــافع لمن مـــــات