ياخلي اليوم والله ضاقت أخلاقي
مرت بي أقدامي وعديت ماجيتك
مريت دارك وأنا هايم ومشتاقي
ولولا السفر والمسافة ماتعديتك
لديت يم البيوت ونادت أشواقي
ياليت بيتي مقابل بابه لبيتك
البال يسلى وتروى فيك الأحداقي
وإن رحت مريتني وإن رحت مريتك
نسمي الشارع ( أحلى درب عشاقي )
ونزرع رصيفه بعطرك يوم شميتك
ونولع شموع حب العالم الراقي
وأرسم على الشمع ناحيتي وناحيتك
قلبين(ن) من الوله من بينها عناقي
وأكتب على القلب ذكرى يوم لاقيتك
يوم إن قلبي بصدري خابره باقي
قبل القدر يرسل أقدامي وخاويتك
قدام لاتستبيح بجيشك أعماقي
وأتلى العهد به رفع رايات لألويتك
وقبل المحك فالخفيا لمح سراقي
يوم(ن) لمحت (المساء) من فوق ناصيتك
وكني لمحت (الصباح) يلوح بآفاقي
وكني لمحت (الشفق) بآخر صباحيتك
وكني لمحت بقدومك نوض (براقي)
وكني لمحت (المجاعه) دون (عافيتك)
وكني لمحت (العذوق اللي على الساقي)
وعرفت ب إنك الخيال اللي تمنيتك
من يومها إخضر غصن ونبتت أوراقي
وغنت عصافير حب وحب غنيتك
كتبتك إنشودة الساري للإشراقي
وطبعت صورتك في عيني وضميتك
ودي أغمض عليك أخاف تنباقي
أنا ماصدقت بالله كيف لاقيتك
ولاأدري أيام صدك كيف تنطاقي
من بعد مانا مع الأيام صافيتك
يكفيك وألا أكشف الباقي من أوراقي
وأدخل على وجه من يحييك ويميتك
عن حاجة(ن) من زعلها تطلق وثاقي
تصير داعي فراق ماتباطيتك
أخاف يوم(ن) يجي وأطري إفراقي
وأخاف يوم(ن) يجي وأقول خليتك
تشتيت الأحباب شي(ن) صعب ينذاقي
يالله دخيلك لاتبلانا بتشتيتك
وياخلي اليوم والله ضاقت أخلاقي
طريت لك طاري الفرقا وبكيتك
الشاعر شباب فيحان