استراحة أبو العريف

**هلا أبو العريف وجمعة مباركة؟
*يا هلا بك والله يبـارك علينا وعلى جميع المسلمين وأحب أبارك لكم مقدّما قرب حلول شهر رمضان المبارك.
**على طاري رمضان الدوري راح يبدأ فيه هالموسم؟
*هو بس الدوري حتى المنتخب حب قبل الدوري انه يسوي معسكرا برمضان عشان يشيك على اللاعبين قبل الدوري ويا خوفي من وجود بعض الأمور اللي تثير الشك وهي اللي خلت الجماعة مصرّين على هالمعسكر مع إن الأندية توّهم راجعين من معسكراتهم.
**وش تقصد يا بو العريف؟
*ابد سلامتك (في فمي ماء) ولا ودي أتكلم الآن ولكن اعتقد أن الصورة راح تكون واضحة للجميع وتبين العديد من الأمور خلال الأيام الجاية.
**إلا وشلون تشوف الدوري برمضان؟
*يا خوي كل العالم يلعبون برمضان يعني هو بس السعوديين اللي (يصومون) هالشهر والباقي فاطرين الكل يصوم ويعتمر ويحج وهذا عمل إذا كان اللاعبون يعتبرون أنفسهم محترفين ولا هم ما عرفوا من الاحتراف غير الفلوس ومقدمات العقود والتصوير بس.
** يقولك نور مسوّي زحمة بالاتحاد؟
* سبحان الله اللاعب طول عمره مسوي زحمة والشارع فاضي لازم قبل وبعد وأثناء الموسم تلقاه مسوّي قضية وفي مثل يقولك (له قرص في كل عرس) يعني لازم يكون موجود وبصراحة هانا مدري وش سالفته يوم متهاوش مع مدرب .. يوم مع لاعب ومرة (مسطر) الجمهور وما دري وشو وكله هو على صح وكل الخلايق غلطانين مسكين.
**وليه ما يوقفونه عند حده؟
*مو المشكلة ما حد يبي يحط له حد عشان يعرف قدره هو لاعب مهم لكنه ما يحمد ربه على نعمة الموهبة وجالس يحرقها بالمشاكل والإيقافات اللي تجيه وناديه هو اللي خسران مع أن ناديه ما قصر معاه وأكثر شي يضحكني يوم يقول انه ما يحب يساوم النادي هذا وهم معطينه عشرين مليونا وأربع عماير اجل لو يبي يساومهم كم يبي؟؟؟؟
** إلا كيف تشوف فرق الشرقية؟
*اعتقد الجماعة شغالين صح جماعة عبد العزيز الدوسري يعملون بجدية والحال نفسه بالنسبة للقادسية واعتقد أن وجود الأمير فيصل بن فهد راح يكون إضافة لأعضاء الشرف القدساويين وحتى إخواننا بالفتح عملهم جيد ومجهود يشكرون عليه ويارب ترجع كورة الشرقية زى زمان وترجع الأفراح بشوارع الخبر ودواعيس الدمام أيام ما كانت الحلويات والمكابيس تتوزع والعصيرات، الله يرحم ذيك الأيام أيام المجد والبطولات صح كانت اسود وابيض والدوري نسمعه بالراديو بس أيام حلوة وللحين أتذكر شارع (بو مية) والفيمتو اللي يبيعونه أول بالملاعب أيام جميلة وذكريات لكن نتمنى أنها ترجع الحين.
** يقولك جمهور النصر حضر بكثافة في المطار يستقبل الفريق بعد ما رجع من ايطاليا؟
*يا ابن الحلال وسّع صدرك وهالجمهور عنده شيء غير، استقبل وودّع سبعين ألفا يستقبلون وسبعين ألفا يودّعون ليت عاد في نتيجة ولا بطولة بالأخير وتصويت وحالتهم حالة يا أخي جمهور النصر يحرق نفسه ويقدم كل شيء واللاعبون محلك سر .. أمر غريب اعتقد لو في فريق بالعالم حتى لو بالمريخ بعد عنده مثل هالجمهور بوفائه واخلاصه وحماسه وتواجده وقربه من النادي ما اعتقد انه يضيع بطولة بحياته مو عشر سنين ومضيع أكثر من خمسين بطولة للحين.
**وشلون تشوف بطولة النخبة؟
*عمل جيد ويشكرون عليه وإذا كانت البطولات اللي عندنا تقام بها لطريقة ما راح نستفيد.
**كيف ما راح نستفيد؟
* قولي أنت ننظم بطولة ونبي نرفع من مستوى أنديتنا وأول شيء أندية المنطقة الجنوبية غير موجودة وبعدين تلاقي النهائي بين فريقين سعوديين معناها الفرق المشاركة اقل من المتوقع وهذا الشيء راح يضعف البطولة بالمستقبل ويخليها بلا قيمة أو فائدة.