مساء الخير على الجميع ..
قصيدة
للشاعر / عباد بن راشد المنحوف
هيه لا تبتسم ما جيت ارجي وصال
ما خسرتك حبيب ولا فقدتك حنين
تحسب اني على خبرك ذيك الليال
ازعل الكون كله لاجل ما تزعلين
ذاك اول وانتي تطلبين المحال
كنت احاول ألبي كل ما تطلبين
يوم قلبك مع قلبي مشى في عدال
كان لك منزل ٍ ما بين رمش ٍ وعين
والله اني ما اصدق كل قيل وقال
اقتنع في كلامك دون ما تحلفين
بس هالحين ما للحب عندي مجال
انكشف سر حب ٍ لو خفيته يبين
اثر ذبح المشاعر عند مثلك حلال
بعت كل الليالي وبعت كل السنين
اختصر لي كلامك ما يفيد الجدال
قولي اللي تبينه واخذي اللي تبين
لو تقابلت انا وياك وسط الخيال
لا تكلم خيالي لو انها كلمتين
انسى اللي مضى ما عاد في احتمال
كل زينك تبدّل واصبح اليوم شين
وعزة النفس شفها في محل الجبال
صعب اخضع بالهوى لو انك تخضعين
هيه وين رحت منت يا غلا راس مال
الله اللي بلاني فيك والله يعين
واسمحي لي واظن ان الحكي معك طال
واعقل الناس تقطع شكها باليقين
بس قبل المفارق ودي أسأل سؤال ؟؟؟
دام ما تفهمين الحب اجل وش تفهمين ؟
.
.
ولكم تحياتىىىىى