بمناسبة مزح النسيم بشعرها = والشمس معزومه على حفلة الغنج
والعطر سادر في بيادر زهرها = من غزة محرم الى نهاية الحج
والقلب مرهي مير كانه ارها = مادلها لفح الجديله ولا سج
عصرية ٍ خالط نداها خدرها = نسناسها غربي ومزناتها بلج
لديت ابروي ناظري من نظرها = والشوق يدوي بالمعاليق ويلج
واشيب عيني من تكسر اعبرها = يوم اتمقلها وانا موقفي حرج
كن الحمَار اللي يشع بنحرها = حبات رمان ٍ تساقط على ثلج
كم ونة ٍ بالصدر جابت خبرها = وكم سهرت نجمه وكم ذوبت مهج
ماني لحالي ذابل ٍ من سفرها = ويصيح من فرقا المظاليل محتج
حتى المرايا واحشتها صورها = ترزم عليها مثل ماترزم الخلج
حورية ٍ قل الكلام بثغرها = يكفيك عشر سنين ماتسمع الهرج
ينبت بصدري من تهذرف مطرها = روض ٍ ورى روض ٍ ومرج ٍ ورى مرج
جتني وانا قبل الوعد منتظرها = شوقي لها صهوة وشوفي لها سرج
استغفر الله من خطايا سهرها = والعذر لله ثم لعيونها الدعج