الشايب اللي زمانه فات بين العرب= وجه تقل منحدر سيلٍ يصب بشعيب
وقتك قضى وانتهى لاعاد تفتل شنب= قضيت وقتك مابين المختبر والطبيب

يامر حبا خل صدرك عرض واد الرقب= ياوليد خدك مصفى مثل لون الحليب
خبره طويله واعرف الفضه من الذهب= ترى السوالف على الشيبان هلون عيب

ياهرش ياللي تشوف الزمل وسط الجنب=الحيل ثاوي ولالك في زمانك مجيب
اللي تقوله مضى واليوم وقتك زلب= واللي تخطه نعلم فوق قولك صليب

لقيت لي بالجبل مخلوق ما له ذنب= الصبح كنه رقيب العصر كنه رقيب
يالحاشي ان كان في جنبك جروح وجرب=بطلاك في جرة الجربان حتى تطيب

ياللي رقيت الجبل ياقربك من النشب= والوبر ماله حلي والعلم ماهو مصيب
لاشفتلي مبتلى قربت زند وحطب= وحطيت من فوق رأسه يالشويب قضيب

شف جفن عيني من الايام فوق الهدب= انشهد انك ولد طيب وشاعر حبيب
عودك ماهو جفر لامنك كويته طنب= لكن طالع لعين الشمس حتى تغيب