اركب على اللي ماعرضناه للبيع
ولا فتح بابه لشريطي يسومي

‏ gxr ماخصص لشركات تجميع
ماخصصوا مصنعه لجل العمومي

ورد من اليابان جوده وتصنيع
مصممه خبير فطس الخشومي

ريموته يشغل بروس الاصابيع
يبعد عن الضايق جميع الهمومي

فيه الثمن سقته ولالي مطاميع
ابيه تحت امري اليا جاء لزومي

ابي اليادقت باراسي رواميع
ادق سلفه في براد وسمومي

اب التمشى بالديار المرابيع
اللي سقاها مدلهم الوسومي

شعاع برقه بالسماء له تلاميع
فلاشات أمن الطرق وقت الهجومي

وعشبه اليا ناشه نسيم الذعاذيع
كنّه صفوف السامري يوم تومي

وروس الزبيدي في فياضه مصاليع
وجول القطاء يروج فوق الحزومي

والجوء هادي جوء كشتة مطاليع
والشمس تطلع بين سحب وغيومي

والنار تشعم والسوالف توابيع
ولكل يدلي في جديد العلومي

وبالليل نسمر والقصايد قراطيع
تحت القمر وملومعات النجومي


حكيم القوافي