هواجيسي لها مده تكثر لي من الأعذار=لو أن اكثر محاصيلي من الأعذار عكسيه
ولاكن مانخلي للنقيده درب مهما صار=تجملنا مواقيف الوفاء في روسنا الحيّه
نحب الطيب ونحب القروم اللي تشب النار=ويشرفنا الكريم اللي على العليا مباديّه
ولانمدح سوى طلق المحيا مكرم الخطار=سنافيٍ تنومس ربعه بذكره وطاريّه
سلام الله على اللي شرفو في حفلة الفرفار=سلام الطيب من طيب الهجوس وصادق النيه
مع الوافين يجمعنا بميدان الشرف مضمار=تنافسنا النشاما فيه خياله ورجليه
أحد قدم من جزال المكارم والعطا قنطار=واحد مما تحوش يمينه يقدم شويه
ولكن سند لامن حضر خلى الرقوم اصفار=وحاز من الثناء شداده ومدهاله وكرسيه
كرم نفس وكرم كف ومكان وقيمه ومقدار=وصيتٍ يفتخربه كل عبسين وعبسيه
هذا المكسب ليا من طاح سوق الينّ والدولار=وهذا المحزم ليا من بارت نفوس الدناويه
حفيد مفرقين الجمع لامال الزمان وجار=تدك الأرض دك وتلطم العيال والعيه
هذا المجد الكبير اللي يخلد للرجال اذكار=بطولاتٍ على التاريخ مكتوبه ومقريه
ماهي بعلوم ناسٍ دقت بوسط النعش مسمار=مساكينن يمانيها من الطولات فقريه
تواريخٍ تروجها وتكذبها شيوخ العار=ولاهي والله حقيقه ولا حول الحقيقيه
شيوخٍ ضايعين عن الصواب وضايعين اشوار =لو التاريخ يعطي ماعطاهم لو مداليه
تحصلهم ليا جيت المحافل أول الحضار=ماغير تدور اول صورةٍ عجله وفوريه
ولا جات الصمايل والنشب غابو عن الانظار=شيوخٍ بس في وقت الرخا وشيوخ شكليه
لكن الراس يبقا راس وفعوله فعول كبار=لو انه مالبس من فوقه عمامه وطاقيه