راكب اللي يسبي القاع في مشيه سبي=مغترٍ باللون لونه مثل ضيق الخيـال
جيب لندكروز فكسار غيـره ماتبـي=عشـرة الالفيـن كامـل ولله الكمـال
حولوه من المصانع لمينا ابـو ظبـي=دار زايد راعي الجود يضرب به مثال
صانعه ياباني الاصل ماهـو بعربـي=صممه للقار والنفـد وابـدع بالخيـال
ماشتراه اللي من المال محتاجٍ يبـي=مركب الحكام ويضا بعد شيوخ الريال
جعل عين اهل الحسد جعلها عن تهبي=سرق الانظار مافيه شي من الخمـال
سايقه ياسايـق الجيـب بالله ياصبـي=نصه اللي بالكرم وافيٍ كل الخصـال
يم نواف الرشيـدي وعِرفـه مكسبـي=ابن معلث رصينٍ مثل حيـد الجبـال
مايخلي منهج الطيب لو كـان يحبـي=وارثه من منبعٍ به عمام وبه خـوال
طايل اليمنى عسى من فدايـاه الابـي=راعي النخوه ليا عدو قروم الرجـال
اعط له خط المـزرف وقلـه مطلبـي=فزعتك ياذيب حلال صعب المستحـال
وانت تفهم بالاشاره ولا انـت بغبـي=وعارفٍ ياذيب يامسندي كل الحـوال
والصلاة اختام وازكـي تحيـه لنبـي=عد ماهب الهواء من جنوب ومن شمال