موقع الشاعرغازي البراك موقع الجميع - اناكل مادعيت الله يجيبك زدتني ببعاد

اناكل مادعيت الله يجيبك زدتني ببعاد

رح الله لا يردك يمكن الدعوات مقلوبه

نفش ريش الظلام وقلت عل المبطيات جداد

رقص وجه النهار وقلت يـادوبى ويادوبه

هنوفٍ لابغت ترمش هدبها يرتفـع بالكـاااااد

يعذبها إلى منه على الوجنه فتق ثوبه

أميزها عن القمرى إلى من جت بـلا ميعاد

وإلى من جت مع القمرى غـدا كلٍ وأسلوبه

سحابه جدها من يم أبوها بارق ورعاد

بغيت أسقى بها روحى لقيت الروح مشروبه

تهادى كنها طفلٍ يمشيه الهوى بركاد

تعطف كنها نار ٍ براس طويق مشبوبه

تجي وإن زادها قلبي غلا زادت غلا وعناد

وإليا مـن قلت يكفي بموت تقول ملعوبه

لهـا فوق القدر عندي مكان ٍ ماعليه اسياد

ولي فـي عينها نظرة هلاك ٍ غصب مكتوبه

أشوف الموت لاغابت وعمري لأقبلت ينعاد

وإلى ابتسمت غشا ظلي مـن الفرحه وراحوا به

بعضها آدمي لكن بعضها مأحتوته أجساد

ملَك واحلى الخلايق ماوصل بالزين عذروبه

تجي مثل الفجر لو الفجر ماهوب دوم أعياد

أنا افدا ظلها لا والله افدا ظل مندوبه

تسولف للندى يسهر على النرجس يبي يزداد

تغني للمطر لليل تصيب الكون غيبوبه

وأبد ماكنت أحس بلسعة الكرباج والجلاد

الين البارحه دمي عواذيلي تقهـووابـه

وأنا وش جابني للحب مـادام اللي مضى مافاد

أنا وش لي ووش للموت لجل عيون رعبوبه

حبيبي لا تعلمني أبد كيف أرضي الحساد

حبيبي لا تعلم جسمي ان الروح منهـوبه

وانا لامن دعيت الله يجيبك زدت فبعاد

كذا دايم هي فرحة العشاق معطوبه