أنا ولد هاجر وخصمـي ولـد روق=حصنٍ تصاقـل والضمايـر نظيفـه
لاحلّق الجمهور طـوقٍ ورا طـوق=مثل الضوامي فـوق وادي حنيفـه
أقدم وأحفظ حقوق وأصفّي حقـوق=وأصـد هجمـات الرجـال العنيفـه
طارد ومطـرودٍ ولاحـق وملحـوق=ومتقاسميـن المرجلـه بالنصيفـه
والا أنت لا عاشق ولا أنته بمعشوق=ولا لك مع أصحاب الوظايف وظيفه
ماغير غصنٍ كل ماهـزّه الشـوق=عرقه لدن وأوراق غصنـه خفيفـه
لبست لك بشتٍ على المتن مشقوق=وكلفـت نفسـك فالامـور الكليفـه
مهزوز شخصيّه وجاهل ومطفـوق=تصـدم براسـك فالجبـال المنيفـه
قدام تشعب ناقتك مع هـل النـوق=الوسم شيفه .. وإسم راعيه شيفـه
تبي الكلام اللـي موكّـد وموثـوق=الكحـل شبهـه فالعيـون الكفيفـه
ماغير حاكم مصر فـاروق فـاروق=ولاغيـر توفيـق الخليفـه خليفـه
وأنا لعبت الشعر طـاروق طـاروق=وأحيان أورّا فيه .. وأحيان أعيفـه
لا عاد له معنى ولا عـاد لـه ذوق=تقاسموه أهـل النفـوس الضعيفـه
طاروق عاريّه وطـاروق مسـروق=وأقـرب قنـاةٍ فاشلـه تستضيفـه
ويصير من بين الغرانيق غرنـوق=ويهز راسـه مثـل راس العسيفـه