أضع بين يديكم أول مشاركه لي أتمنى لها القبول وأن تصل لذائقتكم
...

القريحه تسهر عيوني وتهدي لك جددها=شاعرك لا بد يهدي لين ما تطوى سنينه
أنت لعيونك بيوت الشعر في ليل آهجدها=وأسبح بحور الشعر وأدور الدر الثمينه
عارف ان غرور ذوقك يلحق النفس بجهدها=بس كيف ارضي غرور الذايقه ودرك خزينه
يا عسى فكري يسوق النادرات ويعتمدها=قبل لا تشره عليه يسجد الحرف بجبينه
التمس لي عذر حرف الشعر يسجد وش بعدها=كان مارضى حسن ذوقك فـ لتماس العذر وينه
ليلة البارح خيالك مر بأشواق وعمدها=وانورت فيك المشاعر وأبتداء قلبي حنينه
شوفتك في دنيتي زينه وتنسيني كبدها=لا تشح بقربك وشوفتك في دنياي زينه
الحقيقه خوف قلبي عاش حرب ٍ ما شهدها=خايفٍ من قرب بعد ودكت الهاجس لعينه
آه من سوط الفراق ان هم بالروح وجلدها=واقع الفرقى هلاك وطاري الفرقى غبينه
بتمشى بأرض حبك مير لا تنسف وتدها = لا تميد الأرض فيّ وتهلك النفس الرهينه
جعل نفسي ما تذوق الرحمه ان جاها وعدها = كان أبكشف عنك سر وقلبي الأسلام دينه
وكان لبيت مطلب صاحبك لا تبتعدها=أيتوجد من عناء روحه ومن نفسٍ حزينه
يا وجودي وجد تاجر زينة الدنيا وجدها=وطاب بقرابه قبل لا تلوي الحاجه يمينه
صابته عين القريب وضاع ماله من حسدها=واثخنت فيه الديون ولا لقى فزعه تعينه
ويا وجودي وجد حاكم غرته مصر ورغدها=يحسب ان شعبه معاه وكل شعبه كارهينه
ناسي ان معظم عباد الله في مصر أضطهدها=واعلنوا ثورة غضبهم وأكثر الواقع يدينه
غرته حلو السنين وعاش نعمه ما حمدها=واخرتها ضاق وسع الكون في نظرات عينه
وجد حالي مثل حاله بس في دنيا فقدها=ولا أنا ماني بظالم وادحر الظالم وادينه
يا حبيبي لاح برق وحنت المزنه رعدها=كان ما سقت لك مشاعر فـ لتماس العذر وينه

وسلامتكم

الشاعر/يوسف غازي الاسيحم


.
.

صح لسانك آخوي يوسف

وبيض الله وجهك على هذه القصيدة

تحياتي لك