الضيف اشوفه شلّع اطنابه يشيل = تحركت في ماتبقى القافله
ضيفا نزل من بيننا ماهو بخيل = من قام بأكرامه ترى اللـه كافله
واحد من الخمسه ولاهو مستحيل = فرضٍ على المسلم ولاهي نافله
جزاه بالجنه تحت ظلٍ ظليل = أنوارها تشرق ولاهي آفله
ولابد للحي المقيم من الرحيل = اخذوا عبر ياهل القلوب الغافله
قدام يتبرى عميلٍ من عميل = في وسط قبرٍ مسكنك في سافله
وسادتك من طين والحافك نثيل = رملٍ منه كل المداخل قافله
رجعت يابن آدم على البيت الاصيل = اللي منه كل الاوادم جافله
إما بروضه كاسها من زنجبيل = وإلا بحفره حرّها لاوصاف له
يوم المؤكل خاضعٍ لأمر الوكيل = ياحظ من ربه رحمه وراف له
جل وتعالى الواحد الفرد الجليل = يرحم دعى من خاف منه وطاف له
يالمسلم استغفر ولاتحاول تميل = دنياك في كل المعاصي حافله
اعمل جميل وفيه تجزا بالجميل = العبد كل اللي عمله يضاف له
وداع يالشهر المفضّل والفضيل = غاب اقمره وهلال غيره شاف له