في صحاري خيالي بالطواري رحلت=طافت الأرض هجني طاويات الشنون
وادي الجن عبقر في ضفافه نزلت=بين ثورة حكيم وبين رقصة جنون
إعذروني جهلت وداري اني جهلت=باختياري دخلت الطيش لا تشمتون
في ضيافة كريم الفكر جيت وحللت=أنظر الأرض خضرا والسماء به مزون
ما نفعنا ثبات العقل يا من عذلت=خاسرين الكثير وغيرنا يربحون
قلت هذا التناقض شعر يوم انفعلت=إدع نقّاد الامه خلّهم ينقدون
لو يقول المنافق يارجل وش عملت=قلت هذا مزاجي مار لاتزعلون
للنفوس الضعيفه والهوان اعتزلت=اتمرّد واخالف والتمرّد فنون
شفت بعض الجنايز فيه روح وذهلت=قلت ليه البلاده والوهن والسكون
في ملام الحقير من الرجال احتفلت=ومن سماح الكريم الموت عندي يهون
جاهلاً كنت عارف كل شيء وغفلت=اتعمّد وانا اعرف كل ما يضمرون
يازمن كنت ظالم ما خبرتك عدلت=منك قبلي كثير من البشر يشتكون
كم مرّه نجحت وكم مرّه فشلت=آتجاهل ظروفي عمد مهما تكون
والهوى من عذابه والعنا ما نكلت=لذة الحب شوق وشوف عين وشجون
عاقلاً عند غضات الصبا ماعقلت=افقد العقل كلّه عند نظرة عيون
تطلب النفس شيء وللرضا ماوصلت=اتحرّا سحابة عطف قلباً حنون