تبين عيالك يعتمدون علي انفسهم وما يكونون ضعاف شخصي
السلام عليكم ورحمة الله وبركاته صراحة لقيت هالموضوع ومره عجبني وحبيت انقله لكم عشان تعم الفائدة الموضوع كبير ومحتاج تركيز ومرونه وفهم مابين السطور لانه طفل عن طفل يختلف بدرجة الفهم والاستجابه والاهم ان هالموضوع موجه لكل انسانه تستحق ان تحمل لقب ام.... بكل مافيها من تعب ومعاناه فالتربيه.... وتعرف ان ربي ملكها روح بل ارواح بتكون مسؤوله امام الله عنها.... من قديم الازل والامهات مربيات... علي الاقل انا اتكلم عن تربيتي ... امي جزاها الله عني كل خير... مربيه من الطراز الاول... فلو نظرتوا لكثير من مواضيعي دايما اذكر عبارت ( امي تقول)... لاحظوا بعد هالسنوات الطوال من الزواج مازالت كلماتها محفوره بداخلي.... ببدأ موضوعي هذا بكلمات لهذي الانسانه العظيمه.. (لولا المربي ماعرفت ربي) وهذا صحيح واكبر دليل... قول الرسول الكريم...عليه الصلاة والسلام (كل مولود يولد على الفطرة فأبواه يهودانه أو ينصرانه أو يمجسانه)... انا اربي ابنائي ليواجهوا الحياة بقوه وجلد وصبر.... ويعتمدون علي انفسهم.... لحد يقول ليه بيحاربون .... نعم بيحاربون وبيصارعون وبيواجهون اعاصير الحياه بدخل فالموضوع مباشره وبيكون علي شكل نقاط... http://www.m5zn.com/uploads/2011/5/1...47k63s9ue7.jpg نبدأ من عمر السنتين.... واصغر شوي... اذا بدلتيلها ملابسها خليها تشيلها وتحطها فالسله... وانتي معها طبعا...بس هي او هو علي الاقل يكون معه قطعة من ملابسه... بعد ما تستخدمين المناديل لها... عوديها تحطها بالزباله... يعني مره ومره.... http://www.m5zn.com/uploads/2011/5/1...xswdfbr6fo.jpg اربع سنين.... وهو عمر الروضه... تلعب علي كيفها وتحوس غرفتها او مكان العابها... وبعد ما تخلص ترجع كل شي مكانه... ومكانه ضروري... وتجمع زبالتها وقراطيس الكاكاو والشبس .... تتعود ماتقعد بمكان وسخ.... تتحمل نتيجة اختيارها وقرارها.... ادري بيتستغربون... بذكر موقفين لي مع بناتي يوم كانوا فالروضه.... الموقف الاول مع ساره.... كانت بثاني روضه... وكان الجو الصبح بارد... وبعدين يدفأ... قلتلها ياحبيتي البسي جكيتك قالت لا.... يابنتي بيذبحك البرد.... رفضت وانا عارفه انها رفضت تقلد بنات معها .... يلبسون نص كم.... تركتها ماشديت عليها لاني عارف.... كلها فتره بسيطه وبيدفا الجو بس خليتها تخوض التجربه.... وحذرتها اني اذا طلعت من البيت ماني راجعه اختها الصغيره سمعت كلامي ولبست.... واول ما طلعنا من البيت لفحها الهوي البارد... وحمر خشمها وقالت يمه برد... قلت ادري علمتك بس انتي عاندتي... والله ان قلبي مثل النار ونفسي هازتني ارجع البسها بس صملت فيها ابيها تتعلم.... مشت وهي ترتجف ومدخله يديها بجيوبها.... واختها تسولف وتضحك... واقولها شوفي اختك شلون مبسوطه ودافيه... المهم لها الحين سنتين الموقف راسخ بذهنها... اذا جات تروح المدرسه فالشتاء تقول البس جكيتي... اقول والله ياحبيبتي اليوم برد وانتي حره تبين تلبسينه البسيه ماتبين انتي حره... تقول لا يمه بلبسه واذا احتريت فسخته... طبعا انبها انها اذا نسته فالمدرسه او فالباص... ما راح اشتريلها غيره طول السنه.... مدارسنا لازم لون معين مو مسموح بغيره فهي عارفه انها ماتقدر تلبس اي جكيت ثاني عندها... الموقف الثاني مع دانه.... تتمرد احيانا علي النوم بدري... افهمها اني ابيها ترتاح والنوم راحه... واذا نامت بدري بتقوم نشيطه وبتستانس فالروضه والله اكلمها كذا نفس ما اكلم الكبار... بس معانده ماتبي تنام... المهم اخليها تطلع من الغرفه عشان ماتزعج اختها واتركتها تتاخر شوي... الصبح طبعا مالها خيار فالغياب بداوم يعني بداوم خصوصا اليوم اللي تنام فيه متاخره.... وبعد مارجعت كانت تعبانه تترجاني ترقد شوي... والاجابه طبعا لاااااا.... وقت النوم قلت جا وقت النوم يالله ياساره... قالت يمه وانا.... قلت انتي تحبين السهر... بتقعدين معي بنسولف ونضحك... قالت وساره... قلت بتنام وترتاح وتقوم الصبح شبعانه نوم ونشيطه.... قامت تترجاني عشان تنام.... بنتي هذي ماتعلمت من مره مازالت تعيدها احيان وانا اكرر نفس العقاب... وهذا يثبت كلامي اللي باول الموضوع طفل عن طفل يختلف... http://www.m5zn.com/uploads/2011/5/1...bq8319wb3x.jpg فالسوبرماركت.... اتلون معهم مره ادلعهم ياخذون كل اللي يبون ومره شي واحد او اثنين من اختيارهم.... ومره ولا شي ويسمعون كلمه ....لا رجعيه.... انا ما اكسر بخاطرهم انا اربيهم.... بطبعي اتكلم معهن اطلع اللي بخطرهن.... اقول عادي مو لازم كل مره تشترون.... وطبعا يصير حوار.... http://www.m5zn.com/uploads/2011/5/1...ff4p03bjmz.jpg اذا شريتي لهم اشياء بسيطه.... عطي كل واحد كيس اغراضه يشيله.... http://www.m5zn.com/uploads/2011/5/1...lwb5btvw7e.jpg احيان اعطيهم مبلغ معين 10 ريال مثلا.... وقولي اي احد يبي شي من فلوسه.... وبعد بذكر تجربتي.... ساره كنت متاكده وواثقه انها بتضيع فلوسها... او بتشتري اي شي المهم ما ترجع ومعها قرش اما دانه ما كنت عارفه كيف بتتصرف.... طبعا ساره قامت تحوس مره تبي لعبه... ومره تبي كراسه... وشوي تبي كاكاو... قلتلها انتي حره بس تشترين بقيمه فلوسك ماني زايدتك ولا ريال.... وفالاخير ضاعت فلوسها مثل ما توقعت وماشرت شي.... دانه... قالت ابي مرطب قلت من فلوسك... قالت ها...لا مابي رجعيه بعدين قالت ابي رغوه قلت من فلوسك نفس الشي رجعته.... وللحين ماشرت بفلوسها شي..... انا عاد شريت شبس وقلت هذا لي ولبوكم... بشوف ردت فعلهن... ساره تتحسر كل ماشافت اختها عندها الفلوس وتقول يمه سامحيني... قلت مسامحتك...قالت يالله عطيني بدالها قلت انا سامحتك انك ضيعتي الفلوس وهي نعمه لكن ماقلت بعوضك بدالها.... احمدي ربك اني ماعاقبتك...لانها المره الاولي بس اذا عدتيها بعطي دانه وانتي لا.... http://www.m5zn.com/uploads/2011/5/1...nn7maoia0h.jpg كثير من الامهات وانا منهن.... استغرب ليه تحل اذا كانت عندي وفالمدرسه لا الاجابه لانها تعتمد علي وجودك جنبها وانها اذا اخطأت بتصلحين لها... المفروض تكونون بغرفه وحده او بالصاله... وتقولين روحي حلي المسائل واذا خلصتي جيبها او اكتبي الواجب واذا خلصتي جيبيه اشوفه... جربت هالطريقه والحمدلله نتايجها حلوه... http://www.m5zn.com/uploads/2011/5/1...7thza824iu.jpg اذا صارله مشكله فالمدرسه.... علميه يروح هو يشتكي للاخصائي.... واكيد اذا كان الامر يحتاج تدخلك بتدخلين بس لازم هو او هي يتخذ خطوه.... يتبع.... |
رد: تبين عيالك يعتمدون علي انفسهم وما يكونون ضعاف شخصي
http://www.m5zn.com/uploads/2011/5/1...ieeq8idkx2.jpg اذا جاء وقت النوم .... علميهم انه هالرسوم المتحركه هذي اخر رسوم بيشوفونها وان كانوا يلعبون حطي المنبه... وقولي بعد ماتخلص الرسوم... او اذا دق المنبه... لازم يسكرون التلفزيون...او يضفون العابهم ويغسلون ضروسهم وينامون... وتكلمينهم مباشره انك متاكده انهم ماراح يتاخرون عن موعد نومهم لانهم شطار وكبار.... وروحي واتركيهم.... لايحسون انك تراقبينهم.... او انك شاكه انهم ما راح ينفذون.... اذا رجعوا من المدرسه.... فالوقت اللي تكونين فالمطبخ... هم يبدلون بنظام ويصلون... ويساعدونك بفرش السفره وصف الملاعق اللبن الماء... اشياء من هالقبيل.... http://www.m5zn.com/uploads/2011/5/1...d0z4nxupxq.jpg اذا رفضوا تفريش اسنانهم.... علميه انك ماراح تجبرينه علي غسيل اسنانه لكن ضروسه بتسوس والسوس يعور.... وريه صور اسنان مسوسه... ويا اما يقعد بشكله البشع بضروس مسوسه او يقلعون ضروسه.... او تقعد اسنانه طول اليوم توجعه.... وانك بتجبرينه يروح لدكتور الاسنان... يجب ان يتعلم فالابتدائي... تعقيم الجروح البسيطه...ووضع نوع من المراهم عليها بعد ما يستشيرك بنوع المرهم... هو او هي تحطه علي الجرح مو انتي.... التفريق بين الجرح اللي يتعقم.... والوجع اللي يحتاج مرهم للعضلات.... http://www.m5zn.com/uploads/2011/5/1...3v5lvcge1p.jpg تخلينه يقرأ علي مكان الالم عندك.... ويدعيلك او لبوه او اخوانه جدته جده.... عشان يحس باهميته ... اساليه اذا كان دعالك بصلاته.... وافرحي اذا قال دعيتلك يمه.... اذا قرأ علي مكان الالم حسسيه ان الوجع خف لاتكذبين وتقولين راح الوجع.... http://www.m5zn.com/uploads/2011/5/1...vsfqcpoxdd.jpg في بدايه الاسبوع.... إإتمنيه علي سر بسط.... وقولي انت او انتي بنتي الكبيره الحلوه... اقدر اقولك سر وما تطلعينه.... وكل واحد علميه شي مختلف... مثلا... قولي للبنت بنسوي اخر الاسبوع مفاجأه بسوي انا واياك كيكه حلوه وبنزينها... لاتعلمين احد لاتخربين المفاجأه.... وقولي للطفل الثاني... فالعطله بنروح لعمانك او خوالك.... او حديقه .... واللي ما يحفظ السر... عاقبيه بانك بتقولين للثاني وهو لا.... وان حفظوه جميعا... شجعيهم (بكلام).... كلام تشجيعي فقط... مو هدايا... انهم عيالك الكبار الحلوين اللي يحفظون السر وانك دايما بتقولين لهم اسرار.... طبعا هذا يعلمهم انهم يحفظون اسرار بيتك.... وحكمة اول الاسبوع انهم يتعودون يحفظون السر وقت طويل.... http://www.m5zn.com/uploads/2011/5/1...3f155m7wyp.jpg اذا طلبوا لعبه... او يبون يروحون للملاهي... قوليلهم بعطيكم كل اسبوع مبلغ... واجمعوه واخر الشهر كل واحد يشتري لعبه علي قد فلوسه اللي جمعها... http://www.m5zn.com/uploads/2011/5/1...763706jf24.jpg فالمتوسط تعطينها مسؤوليات تناسب سنها.... وتساعدك حتي مع وجود خادمه.... وفي ايام الدراسه... الحكمه انها تتعود تجمع بين عملين في وقت واحد من رايي فهالعمر يكون فالبدايه مصروف اسبوعي بعدين شهري.... ويكون نوع من الاستفسار والمحاسبه بشكل غير مباشر عن الاشياء اللي صرفت فيها..... فالعطله تكون مسؤوله عن العشاء.... وكل ما كبرت تعطينها مسؤوليات اكبر.... تطبيق هالامور يكون موزع بين شده ورخي... مره ومره... مو نظام عسكريه... لابد من الحزم في مواضع الحزم... مقنعه في موقف الاقناع.... حنونه مشجعه عن الانجاز.... تعتقدون بعد هذا كله بيكون للضعف مكان في شخصيتهم اسال الله ان يصلح بناتي وجميع عيال المسلمين وان يعظم لنا اجر صبرنا علي تربيتهم وان يجعلهم بارين بنا تم بحمد الله... |
| الساعة الآن 10:20 AM. |
Powered by vBulletin® Copyright ©2000 - 2024, Jelsoft Enterprises Ltd. TranZ By Almuhajir