ياطارق الشعر مايكفيك روس النعام=إن ماطرقت النسور الحدب جتك الطيور
كم لي ألوك العصب واطحن قصيدي عظام=واشطر صخر وآتغيب في خضم البحور
لين انكسر صمتي وفضيت نذر الصيام=وفجيت صدري عن النار لبراد السطور
مابين صمت الحكيم وبين سل الكلام=إلا عِظم خطب ضاقت في فضاه الصدور
هذا محمد عليه أفضل صلاة وسلام=هذا اكرم الخلق من قبل القلم للنشور
نزل عليه الوحي بعد الصحف بالختام=واكمل للإنجيل والتوراة قبل الزبور
سيرته فاحت مثل فوح النفل والخزام=رحمة ودين وحسن خلق ومبادي ودور
والله ماخلق مثله بين كل الأنام=ازكى المخاليق من دونه لحقها القصور
أكبر من المجد عند الله وصاحب مقام=في يوم كلاً تبرى من مقام وحضور
تذهلبه المرضعة قدام وقت الفطام=هوله يشيب السواد وغصتبه النحور
دونه بشعري ودرعي والقنا والحسام=مالي وعرضي عن لسان الجحود الكفور
يابو النصارى قضبت من البعير السنام=وأنت الضرير ومقامك بين خف ٍ و زور
جيته منوخ لعب فيه الضما والخطام=تروى السكاكين عزمه بارك ٍ مايثور
جراك من داهنك حتى بلغت المرام=من لاطمين الصدور وعابدين القبور
وجراك مستغربين الفكر والانقسام=اللي خذوا من تمدنك الخنا والسفور
ياراية الدين شعي في زوايا الظلام=شيب قيامي يدور بين الأرحام نور
مليت و انا ازرع الزيتون وارسم حمام=واعدائي تدكني ظلم وتغطرس وجور
الحرب فتنة..وفرض إليا استثار العسام=والموت وجهه كليح لغير وجه الشكور
ودي بصبح ٍ سحايبه الرمك..والسهام=وبله ونبته حقوق وغطرفات وسرور
مايبني المجد رجل ٍ عن حقوقه ينام=ولاخضب البيض غيرك يالجسور الغيور
مرت عيوني على سيسان وصرح وهدام=واغمضت وضلوعي لجمري مكاسر بخور
تدري وش آخر مدى فالذل والانهزام=لاصار قلبك يبا النصرة وكفك يبور

دام المواقـــــف طيبة والصمت عيــــب=وشيـوخـهـا مـاهـذبـت رعيــانـــــــها

خـذ مـنـي المـعـنـــى ودور لـك لبـيب=يـفهم مدى الطلقـة علـى نيـشـانــــها

اقبلت لا نـاقـة بعيـــــن ولا كــليــــب=واقفـيـــت تاخذك الردى باحضانـــها

تجسر على الوادي ويطرحك الشعيب=ياصغيــــر الخـمـة ويـــا فنـانـــــــها

مــاخـذت عـلـم ولاتحسـبنك تجيـــــب=معي ليــا صــــار الفخر عنـوانـــــها

يــاقف لنــا التاريخ لو كنت الرقيــب=والقـــوم تعرف من ديـــر جدانــــــها

لاقلت ((حرة عبس)) كوسر كل ذيـــب=تفـنــــا العمــار ويمتلي ميدانــــــها

من كــابر لكــابر على صلف ولهيـب=((بني رشيد)) تجــوب في جيانــــها

إليـــا فتحت العين لاتنسى الطليــب=الأرض حنـــا سرجـــها وعنانــــــها

عشنـــا بـها عـزة وعاشتنا حسيــب=كـــم فارس ٍ جندل على صوانــــــها

حـدودهــا شلفا وبــارود وحريـــــب=مـــاهي رسوم ٍ ركــزت عمدانــــــها

من هازهــا نهديــه بالصارم لشيـــب=والطيـــر يشبع في طرف وديانــــها

يكيـــد صدرك في فعايلنا ويخيـــب=والنــــار ما تـــالع بلا دخانـــــــــها

كم شيخ من قومك حذفناه بقليــــب=وإليـــا صدرنا غن عوج ألحانـــــها

حامينها بالجاه والسيف الخضيـــب=واليوم يرضيــنا حكم سلطانـــــــها

صحيح ماقاله رســول الله مصيـــب=يارويـبـضة وقتك غديت لسانـــــها

هذا زمــــان الحـر ما يلقا نصيـــــب=تكـسـر عليــه البـومـة بجنحانــــها

مايبغض أهل الطيب رجال ٍ يطيـــب=ولا تطلب المدات مـن مـنـانـــــــــها

كلا ً من الأمجاد له روض ٍ عشيـــب=وكل العرب تاقف على ريضانـــها

أديب في شعري وفي فعلي أريب=اللـــه ولا قـــولا ً يحـقـر شانــــــها

عشيت ذيبي عقب ترديد القنيـــــب=من طرش سافلها و ردى شيخانـها

ياحادي الركب عذبـك التعب والسـهـر=والنــــاس ما تفرق الزينة من العايـبـه
خطبت ســود الليال وكان جفنك مـهـر=وانّجبت منها النوافــل وانكفت خايـبـه
لك منكبيـن وعزوم وسـاعدين و ظـهـر=تفرق إذا نــاب من عكف الزمن نايـبـه
غير التراحيـب وسمــانك لاشحّ الدهـر=صفـر ٍ تفـــوح البهـــار بكيفـــها رايـبـه
لاتستضيق ان تشرّه صدر بيت وطهر=ماختلفت الخلق وعيون العقل صايبه
لو ينكر الروض طيبك كنت فيه الزهر=تسجع لك الورق وعبوقك لنا طايـبـه
ترعـاك عين الضرير وينثني لك نهـر=و أذّنـك الأبكم ونفس ٍ بالعـــنا ذايـبـه
اغراك وكر الخشب واقبلت.. مثل الشهر=ريشتك في طــولها وسبالـها شايـبـه
عيّا يشيــلك لو أن الريش منه اشتهر=وأنت المواكر بحضرة حومتك غايـبـه
اصبر على منت يطويك الشقا والقهر=مصيـــر الأيــام تقريـــك العذر هايـبـه
ماكان قلبك ذهب لو ماحترق وانصهر=وماكنت اشمك لو قلـوب العرب تايـبه

غربي الهبّة على رِسلك عليه=ما بقابي من عنا الأيام باقي
لو رماد الصّدر يسترلي خطية=كل ماهبّيت..مازان احتراقي
طالت الطرقة وحفّيت المنيّة=حالفٍ ماجوز لو جبّيت ساقي
إيه ياخِرد السنين الجرهدية=ماوقاني عن سموم القيظ واقي
علّ دلوي ماتحضّنه الركيّة=دامني في سلّم الأسباب راقي
واليدين اللي تعدتها يديّه=ماتطول إلا على حد التراقي
ضامي وبيدا طرادي سرمديّة=كل ما غنّيت صدر الارض ضاقي
نفس..شومي ماخلقتي للردية=اسمك أكبرها وبالغالين هاقي
ماثنيت الباس والسيرة خفيّة=شرهة الحنظل تكذبها السواقي
كان عين الغيظ تقراني بنية=هذي عيون الرضا خيرة نياقي
كل فجّ ٍ له شجاع وله مطية=والله الحافظ والأعمال البواقي

يا طير لو جنحانك عراض وطوال=وثقال مالاعت متون الهبايب
ادرج ولك بين السماوات مدهال=واغسل همومك في كموم السحايب
لا صرت معطى في عيوني ولا زال=محروم لاتنزل على كل نايب
خل الأراضي لو بها الصيد يختال=وجبالها ماكر ومربا ونصايب
العز لو بيـن على روس الأقذال=ماطابلك لو قالوا الناس طايب
مادام من فوقه لك بيوت وآمال=إن كان ماتبني ثرياك خايب
الأرض من خلقت على كف الأهوال=عجايب وياهولها من عجايب
لك فوقها بين الطواريح حيـال=ولك كف عايب بس ماهو بعايب
يازنك في درهم و دينار و ريال=وأنت الكرم وأنت الجروح العطايب
حتـام وجروح الآوادم على جال=ماحصلت حتى كفوف القرايب
غنيتلك والضيق مثل أشهب اللال=في صدري ونفسي ضماها كتايب
لو مربك مامر في ممحل البال=شابت قحوفك من شباب المصايب

ياقو جرح الحبيب و ما اضعف الدمع=فـي محجـر اللـي يهـاب امـن المذلـه
مواجـعـي كـثـر حـبـي مالـهـا جـمــع=مـن كـل لـون اسمـر ومـن كـل مـلـه
الحـب درب ٍ ماهـو للـشـك و الـرمـع=تـشـوفـه الـعـيـن والـخـافــق يــدلــه
لاتكتـفـي بالضـيـا وتـخـلـي الـشـمـع=بـعـد الوفـالـك يـخـاف الـيــوم ظـلــه
تعـال ضـمـه وشـاغـب فـكـره اللـمـع=مــن طـلـتـك مـابـقـا فالـقـلـب زلـــه
خله علـى راحتـك يغفـى عـن القمـع=و دنـق علـيـه بـدفـا صـوتـك و قـلـه
إنــك حبيبي..قدر..مـايـروي السـمـع=و ينبت علـى الصـدر ريحانـة و فلـه
و أن نام نومـت غريـر لراحتـه طمـع=ادر أنــه اسـعـد طـفـل بالـكـون كـلـه

الـعـقـد بــــه لـولـوة ولا الـبـقـيـة خـَــــــــــرَز=تقـــراه عيـــــن البخيـــص ولا قدره الجهــول
مـــا شــالـــه إلا الزمـــن والحظ لامـن بـَــرَز=هيـّـالك المستحيـــل وصـــــار كفـّك يطــــول
هـذا من الحسنّ كــلّ و بالعيــــون انفـَــــرَز=بقلـــــوب عشــاقه وبكفـوفـهم والعقــــــول
اللي ســـواته غني من دون عــذر ومَـــــرَز=يغريـــك شوفــه ويجبرك لجمـالـــه تقـــــول
ليــــه الرماح احـتـمـت رمـّـانها والكـَـــــــرَز=فيــــها من الشهد ما يروي ضــما كـل لــول
فرخ الشيـــاهيــن تــوّ الريــش فيـــــها دَرَز=لا تفــتر الريـــح جنحـانك وطبـعك جفـــــول
إليــا تقرّبت من صـــادق سهامــك غـَـــــرَز=بيــــن الحنـايــا من الرهـبـة حوافر خيـــول
قـالـت من الشمس قلت أنتي صعيدك جَـرَز=كل الكــواكــب آواخـرها غـــروب و أفـــول
أنتي سراب ٍ ليّــــا شارفتـــله مــا انحَـــرَز=قلـت اكـتـبـه والضـــما يفـداه عني عــذول

جاك صوتي طرب لو خافقي ماطـرب=بيـن حكـم الظـروف وبـيـن توقيتـهـا
ماعلـى الشـوق لا بيـن بعينـي عتـب=عيـبـي الــروح لا نــادت ولا جيتـهـا
عـادت العـيـن لا حـبـت تـحـن اللهب=مـــر فـــي مـوقـهـا لعـلـهـا وليـتـهـا
كان مالي حبيب إلا أنت بيـن العـرب=كـــل مـاهــب ذكـــرك دار مـريـتـهـا
حافظك عن عيون الخلق نون وهدب=وكـم طيـوف ٍ مـن التحنـان ضميتهـا
حالي الصـب لـك غنـا الغـرام وكتـب=ياصـلاة ٍ عـلـى الأصـحـاب صليتـهـا
رمـد الحـب ماباقـي بصـدري حـطـب=ماحشمت الضلوع اللـي لـك اركيتهـا
كنت احسبنك ارحم واثر ضلعك حدب=كيف نفسـك تعـاف مـن الكبـر بيتهـا
قـل شوقـي وذقـت النـوم بعـد التعـب=نفسـي إن رخصـوا الأحبـاب غليتهـا
دنيتك عن نحاس الناس تكشف ذهب=ولا أنـا رجـلـي امــن الـعـام سريتـهـا

ولعي ياجمرة الشعر من راس الغروب=كان غابت شمس الاحباب بامري ولعي
باقيا ً فالقلب طعنة من شتات الحروب=والرماح اللي روتني تبي تاكل معي
والعيون اللي تمادى على نزف القلوب=لاتخاف أن شق ميثاق شعري مطلعي
كن شمسي ماتضرت على ذل الغيوب=ماخذ ٍ من طيب حاتم وفتل الاصمعي
كم نويت اطفي لواهيب في صدر الهبوب=ساعة ٍ والغبن يرعى معالقي رعي
لا طرالي هاجس ٍ زف ريحه من جنوب=جيت اثر الورد فالدرب وابدي مطمعي
ذاك لامنه طرالي تقاصرت الدروب=غيرها منهو تجرا وسيل مدمعي
مرتوي من جوف عيني وفي عرقي يذوب =مسكنه بين الحنايا وسجان أضلعي
كل بيت ٍ قيل يفداه ماقلت محسوب=طفلة ً خلت ضلوعي وطن هم ونعي
لو يزيد الصد كيله بميزان الذنوب=مانقص للحب ذرة ليا زاد الوعي
لكن الوقت المزكا تباكره العيوب=كنه اللي يحتويني وكنه معمعي
الليالي حملها زاد واصبحت مغصوب =وأن تغلب في الاقدام أنا اقول ارجعي
حفظ ما وجهي هو اللي يخليني اتوب=خايف ٍ لا الد شوفي واجرح مسمعي

بلجا محـــاجر ودعجا عيــن=وأرها من السيـــف حاجبها
والمبسم أفلج وضحكه دين=عليـه كـم عيــن تغصبــــها
تمشي مابين الدلع والليـــن=والأرض محدا ً مرطبــــــــها
فيـــها وقار وعليــها زيــن=والعـطـر حـــارس جوانبــها
هذا الرقيـــق الصغيـر منين=عيًــا على البــال مضربـها
اسم اللـــه ودعوته حاميــن=حتى تبـلًــغ مطالبـــــــــها

ينتابني مـن صـادق الشـــوق مــــــرات=مـا يثــلج الصــدر و يبـــدد همـــــــومه
لحظـات تـاخذني على بعض الأوقات=يوم إن بـالي هادي الفكـر يـــومه
لأحبـاب تمنعهم حــدود و مسافــات=وأصحاب ٍ ادنـــاهم تنـومس علـــــــومه
تجمعوا مـابيـــن شكوى ونـبـضــــــات=ليـــن استقـروا في عوالــي رجـــــومه
سـوالــف اسمعها بصدري وضحـكـــات=يفرح بـــها الجـــالي على غير قـــومه
مـالــي على ضيوفي معاتب وشرهـات=حلـــوا هـلا والكـل شـرف قـــــــــدومه
ليـــــلة سمر جبــــت قـديـــــم الحزازات=يـسـهـر لـــها جـفن ٍ جزع منـه نـــــومه
امــطر عليـــها حــروف وتنــــبت أبيات=تزهر جراهيـــــد الورق مـن وســـــومه
ريـــــاض وجنـتها قصــــيد ورحـابــات=خــالج عبقـها فيـــض نفسـي ولـــومه
فيـــها من القيصــوم و الشيـــح جنـات=وفيـها من شيـــــوخ النبــات وقرومـه
يلـقى بـها من يعـرف الشــوق لوعــات=و يحيـــط مغزاهـــا بغـزرة علـــــــومه
هـيــهات اجردها على الكل هـيــــهات=من لا ارتـقا مالـــي بـهــزة كـمــــومـه
عيـــــا جـمـلـهـا إلا الدروب الطـــويلات=ينــفـي خبـــث حيــرانها في سمـومـه
أمـــــــا مـقـاديـــم ٍ تبــــنا و ذريــــات=ولا يكـفـي من هـل الســوق ســــومـه
نيشـانــها نجــوم ٍ تقــــــود المجـــرات=و رمايــها صــابت مضـارب سهــــومـه
بيـــن ظــلام الليـــل عن بعض الأصوات=وعسـعس علي وغــارت أكبر نجـومـه
ينـتابنـي شـعـر وخـيــــال ومتـاهـات=اثــلـج بــها صـدري وابـــدد هـمــومه