يا طير أنا شاريك في ظهرة اسهيل =قدام مزن الوسم ينشي وينداع
بأول عبور مسابقات الهماليل =اللي لهن في ذرة القفر مرتاع
واليوم تلقيح الغروس المظاليل =راح الهدد والقيظ بانت له أنواع
عشرتك زلت يا عريض السراويل =ما عاد لك بالسوق شاري وبياع
جبتك وحش طرح الشبك والمحابيل =وبالخيط علّمتك على حسن الأطباع
ومحشّمك عندي واداريك بالحيل =ومن كثر ما أحبك امسمّيك مناع
دوّرت لك صيد الخلا بالمهاميل =مع كل فج ولا توفقت مطلاع
رحنا وجينا مع رجال مشاكيل =وشفنا سهل وبحار ورجوم وتلاع
والله ما عينت فيهن محاصيل =إلا الكثير من التعب واشهب القاع
وأنا أرجي الله بالليالي المقابيل =يجيلنا دورك على خير وسناع
دور تجي فيه الحوايم زعاجيل =تشوف عينتهن يمرنّك اتباع
وسهيل يطلع عقب هود من الليل =يوضي شعاعه مع سنا الصبح لمّاع
بوقت هواه ينشط الجسم والحيل =امنين ما هب الهوا جاك ذعذاع
وجتنا تزبّر من صدوق المخاييل=بوسم بكور وبارقه له تشعشاع
أمطر وديّم وأوله كثّر السيل =وتتابعت مع ساقته هدب الارجاع
وزاف الربيع ونبت عشب الدهاكيل =والحزم جا لقليقلانه تمرياع
عشب مخلط فيه نوار وكحيل =أمهضب كنه بساتين زراع
وزان القنص واتزهبوا يا رجاجيل =بالطير والموتر وزينات الاوقاع
وتمت بذكر منزل الحق تنزيل =اللي شفى لأيوب من كل الأوجاع